Me qëllimin për të mbledhur një pjesë të principalit dhe për të mbyllur dosje të hapura prej vitesh, shteti po heq dorë nga qindra miliona euro detyrime të papaguara të bizneseve përfshirë gjoba dhe kamatvonesa.
Vetë Drejtoria e Tatimeve si pjesë e ligjit të faljes së detyrimeve tatimore dhe doganore bënë të ditur se mbi 306 milionë euro detyrime tatimore janë fshirë deri tani, duke e kthyer këtë veprim në një nga ndërhyrjet më të mëdha fiskale të viteve të fundit.
Shifrat e administratës tatimore tregojnë se përfituesit kryesorë janë bizneset dhe individët me detyrime të mbartura ndër vite, ndërsa numri total i përfituesve ka kaluar 130 mijë tatimpagues.
Ndonëse procesi duhet të zhvillohej në 3 drejtime falje me kushte, pa kushte dhe kompensimi automatik i tepricave kreditore me detyrimet tatimore, vërehet se falja me kushte ndonëse ka nisur nuk ka asnjë të dhënë.
Por konkretisht të dhënat e publikuara nga administrata tatimore tregojnë se një vlerë e madhe financiare është falur pa kusht. Deri tani janë fshirë ose shuar rreth 215 milionë euro detyrime, ndërsa kanë përfituar mbi 25 mijë tatimpagues. Kjo kategori përfshin bizneset dhe individët që duhet të kryejnë pagesa brenda afateve të përcaktuara për të përfituar uljen ose heqjen e detyrimeve.
Ligji parashikon që për detyrimet e krijuara në periudhën 2015-2019, të falet 50% e principalit, si dhe të hiqen plotësisht gjobat dhe kamatëvonesat, nëse pjesa e mbetur paguhet brenda afatit të parë. Ndërsa për të njëjtën periudhë, falet 25% e principalit nëse pagesa kryhet deri në fund të vitit. Për detyrimet e viteve 2020-2024, falen të gjitha gjobat dhe kamatëvonesat, me kusht që të paguhet 100% e principalit.
Administrata ka fshirë automatikisht dhe rreth 91.6 milionë euro detyrime për mbi 105 mijë tatimpagues. Këtu përfshihen kryesisht gjoba administrative, penalitete dhe detyrime të vjetra që ligji i konsideron të pambledhshme ose që plotësojnë kushtet për t’u fshirë automatikisht.
Një tjetër komponent i rëndësishëm është kompensimi automatik, ku tepricat kreditore të tatimpaguesve janë përdorur për të shlyer detyrimet ekzistuese. Deri tani janë realizuar mbi 86 mijë transaksione, me një vlerë totale prej 10.4 milionë eurosh, duke përfituar mbi 13 mijë tatimpagues.
Por përtej shifrave, ligji ka ngritur edhe debat mbi ndikimin e tij. Nga njëra anë synon të pastrojë stokun e detyrimeve të vjetra dhe të rikthejë në formalitet mijëra tatimpagues. Nga ana tjetër, ekspertët kanë paralajmëruar se faljet e përsëritura fiskale mund të krijojnë pritshmëri tek debitorët se detyrimet mund të falen edhe në të ardhmen.
Bizneset duhet të paguajnë principalin brenda afateve të përcaktuara, 50% deri në 30 qershor dhe 75% deri në dhjetor 2026 për të përfituar këtë pjesë të falur nga shtetit.
FALJE PA KUSHT
215 MLN EURO
+25 mijë tatimpagues
FALJE PA KUSHT
91.6 MLN EURO
+105 mijë tatimpagues
SKEMA E FALJES SË DETYRIMEVE
2015-2019 Falet 50% e principalit, fshihen gjobat
2020-2024 Paguhet 100% principali, fshihen gjobat
/TCH
