Nga Ardit Rada/
EKSKLUZIVE JAVANEWS/ Duket se ministri i ri drejtësisë Petrit Vasili ka vendosur të ndjekë nga afër “shembullin” e paraardhësit të tij Ylli Manjani. Sidomos kur bëhet fjalë për të vijuar me teoritë e komplotit që lidhen me reformën në drejtësi dhe rolin e ndërkombëtarëve në proces. Pasi shefi i tij partiak Ilir Meta ka deklaruar në mënyrë të përsëritur se s’do të ketë veting ambasadash, ministri aktual i drejtësisë po kujdeset këto orë që të ndërtojë një teoremë dyshimi mbi panelin e ekspertëve ndërkombëtarë që do të marrin pjesë në procesin e kontrollit të gjyqtrëve e prokurorëve.
Javanews ka mundur të sigurojë një letër që ministri Petrit Vasili i ka drejtuar kreut të shtetit Nishani, kryetarit të Kuvendit Meta, kryeministrit Rama dhe ambasadorëve Lu e Vlahutin, në të cilën ngre shqetësime në lidhje me një komunikim të Kryetares së Operacionit Ndërkombëtar të Monitorimit Genoveva Ruiz Calavera, me sekretarin e përgjithshëm të Këshillit të Ministrave. Vasili shprehet se prej këtij komunikimi mes panelit të ekspertëve dhe Këshillit të Ministrave (ku ai vetë është anëtar!), “lindin shqetësime të rëndësishme” në lidhje me atë që sipas informacioneve që ka marrë ministri, është quajtur Bordi i Menaxhimit të Operacionit Ndërkombëtar të Monitorimit.
Pasi ngre këtë shqetësim me shkrim, për të gjithë zyrtarët e lartë të shtetit dhe ambasadorët e sipërpërmendur, Petrit Vasili ngulmon në letrën që po botojmë të plotë, tek konsensusi i arritur rreth reformës, duke aluduar se prezenca e ktij Bordi përbën një devijim nga teksti i shkruar dhe nga fryma kushtetuese që mbështet reformën. Me fjalë të tjera, Petrit Vasili preokupohet në letrën e tij, se persona pa tagrin dhe nivelin profesional të ekspertit ligjor, mund të ndërhyjnë politikisht në procesin e reformës në drejtësi.
Zhurma që bën Petrit Vasili synon hapur mbajtjen nën tension të hapave të para të procesit të zbatimit të reformës në drejtësi. Përtej fasadës me të cilën ai vesh qëndrimin e tij, duket qartë se Meta dhe ministri i tij i drejtësisë kanë shqetësim dhe stres ndaj asaj që po ndodh këto orë me panelin e ekspertëve ndërkombëtarë. Megjithëse tashmë gjithçka që ka të bëjë me reformën është e shkruar dhe e zbardhur e zeza në të bardhë.
