Nga Flogert Muça
Mbrëmë në mesnatë, një portal i financuar nga Shkëlzen Berisha, publikoi një shkrim të kopjuar nga një portal italian, ku flitej se në Shqipëri qenkan zhdukur mijëra tonelata mbetje që po transportoheshin nga Italia drejt Maqedonisë. Fakti që lajmi në Itali ishte botuar nga një portal pa asnjë kredencial, pa asnjë gazetar, në pronësi të një ish-senatori të burgosur për korrupsion, sigurisht nuk ishte problematik për disa portale shqiptare. Të cilat, të financuara nga paratë e politikës, nuk kryejnë as minimumin e verifikimit, por kopjojnë gjithçka u urdhërohet nga shefat dhe financuesit e tyre politikë.
Fatmirësisht, gazetaria investigative dhe ajo profesionaliste, edhe pse janë goditur rëndë, ende nuk kanë vdekur në Shqipëri. Portale të tjera profesioniste dhe kolegë gazetarë me integritet, zbardhen shumë shpejt të vërtetën e shkrimit të rremë.
Sot, portalet politike të Shkëlzen dhe Sali Berishës, u përpoqn sërish të hedhin baltën e rradhës, duke servirur të njëjtin lajm të rremë, për të dytën ditë rresht. Sigurisht, bëhet fjalë për një lajm të diskredituar, i cili bëhet vetëm e vetëm për qëllime politike: Së pari, për të zbehur provat që implikojnë Shkëlzen Berishën në aferën e madhe të CEZ dhe së dyti, për të ngritur artificialisht një frymë të re opozitare në Shqipëri, meqë çadra e Lulit duket se nuk po frymëzon dot me as Saliun.
Gjithësesi, pavarësisht se lajmi që pretendonte se Prokurori i Përgjithshëm Italian dhe ai Shqiptar kishin biseduar për hetime rreth çështjes në fjalë, u hodh poshtë katërcipërisht nga vetë Prokuroria e Përgjithshme, lexuesi shqiptar duhet të edukohet rreth asaj çfarë përbën një lajm të saktë, nga lajmi i rremë.
Në të gjithë botën, e sidomos në SHBA dhe Evropë, ekzistojnë me qindra portale të cilat nuk kanë lidhje me gazetarinë. Shkrimet e tyre nuk kanë asnjë emër, asnjë mbiemer, asnjë citim, asnjë fakt, asnjë dokument që provon vërtetësinë e argumenteve apo të fakteve që paraqesin. Këto lajme të rreme, fabrikohen kundrejt pagesës, vetëm e vetëm për të hedhur tymnaja e për tu përdorur politikisht nga persona të caktuar.
E njëjta gjë ndodh edhe në Shqipëri. Paratë e pista të politikës, financojne portale, gazetarë, gazeta, të cilat nuk kanë asnjë lidhje me të vërtetën, gazetarinë, apo informimin.
Është detyra jonë si gazetarë profesionistë t’i denoncojmë këto raste dhe të mos publikojmë asnjë shkrim të tyre, madje t’i demaskojmë ato.
Me shpresën se në fund, edhe lexuesi do të dijë të zgjedhë se ku të informohet.
