Deputetja nga grupi i socialdemokratëve europianë, Tanja Fajon pdeklaroi se është shumë e kënaqur me mbështetjen bindëse të cilën të gjithë qytetarët e Maqedonisë i dhanë marrëveshjes me Greqinë por është e shqetësuar nga abstenimi i lartë.
Ajo vlerëson se “tani e ka radhën Kuvendi për miratimin e amendamenteve Kushtetuese”.
“Kryeministri Zaev ka mbështetjen time të plotë dhe shpresoj se Marrëveshja do të miratohet, çdo skenar tjetër nënkupton kthim prapa”, paralajmëron Fajon.
Maqedonia ka qenë e paaftë të përparojë dhe ka humbur shumë kohë në rrugën e saj drejt BE-së dhe Natos. Por besoj se Marrëveshja ka ende mundësi të kalojë”, theksoi ajo.
“Anëtarësimi në BE dhe NATO është skenari më i mirë për Maqedoninë”, thotë Fajon.
“Tani krerët politikë dhe opozita duhet të tregojnë pjekuri dhe mençuri dhe t’i vendosin interesat e Maqedonisë para interesave personale”, porosit eurodeputetja nga Sllovenia.
Sipas Fajon, “BE-ja dhe NATO-ja do të vazhdojnë ta mbështesin Maqedoninë në periudhën e ardhshme që të mund të realizohen qëllimet euroatlantike të vendit. Gjithashtu, qytetarët në këto çaste duhet të tregojnë përgjegjësi para së ardhmes së vendit të tyre”.
“Sa i përket bojkotit, ne nuk e dimë se kush janë ata njerëz të cilët kanë bojkotuar dhe pse, unë i ftoj të gjithë qytetarët që të ndërmarrin përgjegjësinë për shtetin e tyre”, tha ajo.
Ajo vlerëson se “opsioni për zgjedhje të parakohshme nuk është mi i miri”.
“Dëgjova se kjo është një mundësi dhe se qeveria është e gatshme për diçka të tillë, por bëhet fjalë për kohë të shkurtër dhe nuk jam e sigurt se sa njerëzit kanë dëshirë përsëri të dalin në votime. Tani është koha që Maqedonia të stabilizohet, nuk është koha për zgjedhje. Maqedonia duhet të jetë stabël dhe e fuqishme”, porosit Fajon.
/b.d
