Institucionet Mikrofinanciare në Kosovë edhe më tutje po aplikojnë kamata të larta si fajde. Norma mesatare e interesit për kredi në Institucionet Mikrofinanciare në Kosovë gjatë gjashtë mujorit të parë të vitit 2016 ka zbritur në nivelin më të ulët në tri vjetët e fundit, përkatësisht në 21,9 për qind. Gjatë kësaj periudhe kohore norma mesatare e interesit në kreditë ndaj ekonomive familjare zbriti në 23,4 për qind.
“Me rënie të normës mesatare të interesit në kredi u karakterizua si sektori i ekonomive familjare, ashtu edhe ai i ndërmarrjeve. Norma mesatare e interesit në kreditë ndaj ekonomive familjare zbriti në 23,4 për qind në qershor 2016, nga 24,6 për qind sa ishte në periudhën e njëjtë të vitit të kaluar. Kurse, mesatarja e interesit në kreditë ndaj ndërmarrjeve në qershor 2016 zbriti në 19,3 për qind nga 23,5 për qind në qershor”, thuhet në raportin e stabilitetit Financiar të Bankës Qendrore të Kosovës (BQK).
Aty më tutje thuhet se norma mesatare e interesit në kreditë ndaj sektorit të bujqësisë regjistroi nivel të ngjashëm me periudhën e njëjtë të vitit paraprak duke qëndruar në 25 për qind, që njëherësh paraqet normën më të lartë të interesit për ndërmarrje.
97.6 milionë euro kredi
Gjithnjë duke u bazuar në raportin e fundit të Bankës Qendrore të Kosovës thuhet se vlera e gjithsej kredive të sektorit mikrofinanciar në qershor 2016 arriti në 97.6 milionë euro, që paraqet rritje të përshpejtuar vjetore prej 25,2 për qind, krahasuar me 2,8 për qind në qershor 2015. “Përshpejtimi i rritjes së kreditimit mund t’i atribuohet rritjes së burimit të financimit të institucioneve mikrofinanciare, kryesisht rritjes së financimit nga jashtë dhe kapitalit vetanak të ndikuar nga rritja e fitimit të mbajtur. Shuma mesatare e kredisë së aprovuar, shprehur si raport i gjithsej vlerës së kredive ndaj numrit të kredive, u ngrit në 2.661 euro në krahasim me shumën prej 2.280 euro në qershor 2015.
Kjo u ndikua nga rritja më e shpejtë e vlerës së aprovuar të kredive në krahasim me rritjen më të ngadalshme të numrit të kredive, gjë që mund të sugjerojë për rritje të kapacitetit absorbues të huamarrësve. Ngjashëm me sjelljen e kreditimit të sektorit bankar, edhe te IMF-të, kreditë ndaj ekonomive familjare shënuan normë më të lartë të rritjes, 28,7 për qind, krahasuar me kreditë ndaj ndërmarrjeve të cilat u rritën për 18,7 për qind. Kreditë ndaj ekonomive familjare në qershor 2016 përfaqësuan 67,0 për qind të gjithsej kredive të sektorit mikrofinanciar”, thuhet në raportin e BQK-së.
Kreditë e këqija, 4,3%
Në raportin e BQK-së më tutje thuhet se sektori mikrofinanciar vazhdon të karakterizohet me nivel relativisht të ulët të kredive joperformuese dhe nivel të kënaqshëm të provizioneve për mbulimin e kredive joperformuese. Në qershor 2016, pjesëmarrja e kredive joperformuese në gjithsej kreditë u zvogëlua në 4,3 për qind, në krahasim me normën prej 5,4 për qind sa ishte në qershor 2015, ndikuar kryesisht nga ritmi më i lartë i rritjes së stokut të kredive krahas rritjes së vlerës së kredive joperformuese.
Sipas BQK-së, raporti i shpenzimeve ndaj të hyrave të sektorit mikrofinanciar ka shënuar
përmirësim krahasuar me vitin e kaluar, si rezultat i rritjes më të lartë të të hyrave të sektorit mikrofinanciar në krahasim me rritjen e shpenzimeve.
“Sektori mikrofinanciar u karakterizua me përmirësim të performances financiare në krahasim me tri vitet e fundit. Në qershor 2016, profiti i realizuar arriti vlerën prej 1.6 milionë euro, krahasuar me profitin prej 1.2 milionë euro në gjashtëmujorin e parë të
vitit paraprak. Rritja e profitit ishte rezultat i rritjes më të lartë të të hyrave në krahasim me rritjen që shënuan shpenzimet. Të hyrat e sektorit mikrofinanciar shënuan rritje prej 16,0 për qind nga 7,1 për qind në qershor 2015”, thuhet në raport.
Aty më tutje thuhet se të gjitha kategoritë e të hyrave shënuan rritje, mirëpo kontributin më të madh në rritjen e gjithsej të hyrave e kishin të hyrat nga interesi për shkak të peshës së tyre më të lartë. “Shpenzimet po ashtu shënuan rritje prej 13,6 për qind, për dallim nga rënia prej 5,6 për qind deri në qershor 2015.
Të gjitha kategoritë e shpenzimeve gjithashtu u karakterizuan me rritje, mirëpo kontributin më të madh në rritjen e gjithsej shpenzimeve e kishin shpenzimet nga jointeresi me rritje prej 9,7 për qind.”, thuhet në raportin e stabilitetit financiar të BQK-së, përgatiti Zëri. (b.an)
