Eksperti i udhëtimeve, Simon Calder ka rekomanduar dy destinacione kryesore evropiane – më pak të njohura – për vitin 2025, në një përpjekje për të nxitur turistët e huaj të zgjedhin vende që nuk janë prekur ende nga turizmi masiv, dhe të cilat i vlerëson si ideale për pushime verore, shkruan Emily Wright në një artikull të botuar në të përditshmen britanike “Express”.
Shumë turistë kanë nisur të planifikojnë aventurat e tyre të vitit 2025.
Evropa regjistroi një rritje mbresëlënëse prej 11% të numrit të turistëve ndërkombëtarë – në shtatë muajt e parë të 2024-ës në krahasim me vitin e kaluar, pothuajse duke arritur nivelet e para pandemisë.
Megjithatë, duket se vizitorët nuk mund t’i rezistojnë joshjes së destinacioneve turistike tradicionale si Spanja, Franca, Italia dhe Greqia.
Spanja është e gatshme të thyejë rekordet e turizmit me mbi 90 milionë vizitorë, ndërsa Parisi pati një rritje të numrit të turistëve prej 18,9% – gjatë Lojërave Olimpike 2024.
Simon Calder rekomandon se britanikët duhet të shkojnë në Ballkan këtë vit
“Të gjitha indikacionet që kemi parë, për shembull, numri i turistëve që qarkullon në aeroporte dhe shifrat e fundit nga kompanitë e udhëtimeve tregojnë se ne kemi “një oreks të pangopur” për udhëtime. Dhe viti 2025 do të jetë fantastik për të ofruar alternativa të shumta”, tha eksperti i udhëtimeve dhe gazetari Simon Calder.
“Nëse dëshironi një destinacion të përballueshëm, atëherë unë do të shkoja në Ballkan – Shqipëria dhe Bullgaria janë dy vende që ofrojnë paketa të përballueshme për pushime”, tha Calder.
Shqipëria
“Shqipëria, një destinacion i ri turistik ofron plazhe fantastike, njerëz miqësorë dhe çmime të përballueshme”, tha eksperti i udhëtimeve Calder.
Me peizazhe malore që të lënë pa frymë, kala antike, një kryeqytet të gjallë – dhe plazhe idilike që mund të konkurrojnë me çdo vend turistik mesdhetar – Shqipëria ka befasuar duke tërhequr 10 milionë turistë të huaj në vitin 2023.
Shqipëria është një nga destinacionet më buxhetore në Evropë. Ju mund të rezervoni një dhomë hoteli luksoze për vetëm 50 euro – ndërsa një vakt i bollshëm do t’ju kushtojë rreth 10 euro.
“Pikërisht përtej ngushticës së Korfuzit, një dhomë hoteli e krahasueshme në ishullin popullor grek kushton 105 euro nata”, sipas shifrave aktuale nga Booking.com.
