Vëmendja e publikut dhe e diasporës shqiptare është përqendruar te mbrëmja e 14 majit, teksa edicioni jubilar i 70-të i Eurovision Song Contest bëhet gati të ndezë dritat e skenës në Vjenë të Austrisë. Shqipëria do të përfaqësohet këtë vit nga Alis me këngën “Nan”, me synimin e qartë për të siguruar një biletë për në Finalen e Madhe.
Pasi dhuroi emocione të forta duke rrëmbyer çmimin e parë në edicionin e 64-të të Festivalit të Këngës në RTSH, Alis mban tashmë peshën e përfaqësimit kombëtar. Ai do të ngjitet në skenë në gjysmëfinalen e dytë, duke performuar i 13-ti në radhë.
Për të mbështetur rrugëtimin e tij drejt finales së 16 majit, votat e publikut shqiptar jashtë kufijve janë vendimtare.
Udhëzuesi i votimit, si ta mbështesim Shqipërinë?
Rregullat e Eurovision nuk lejojnë votimin nga brenda territorit të vendit përfaqësues, çka e bën diasporën faktorin kryesor për kualifikim.
Për ata që ndodhen në shtetet pjesëmarrëse (gjysmëfinalja e dytë)
Nëse ndodhesh në një nga shtetet pjesëmarrëse në natën e dytë të gjysmë finales, me 14 maj, voto me kodin 13 me numrin përkatës të vendit ku ndodhesh gjatë kohës që hapet televotimi.
Për ata që ndodhen në shtetet jo pjesëmarrëse
Nëse ndodheni në një vend që nuk merr pjesë në këtë edicion të festivalit, sërish mund ta jepni kontributin tuaj. Organizatorët kanë vënë në dispozicion platformën zyrtare esc.vote, ku mund të votoni online lehtësisht.
Rregullat e garës dhe shtetet që votojnë
Këtë vit, rregullorja përcakton se vetëm 10 shtetet më të votuara nga secila gjysmëfinale do të kalojnë në fazën finale. Fati i artistëve do të vendoset nga një sistem i kombinuar, i ndarë mes votimit të publikut dhe vlerësimit të jurive profesionale.
Vendi pritës, Austria, së bashku me Francën dhe Mbretërinë e Bashkuar do të performojnë gjatë spektaklit dhe do të kenë të drejtë vote.
Këto të fundit janë pjesë e grupit të ashtuquajtur “Big 5” (së bashku me Gjermaninë dhe Italinë), shtetet themeluese dhe financuese të festivalit, të cilat, bashkë me vendin organizator, kualifikohen automatikisht në Finalen e Madhe.
