Gjermania ka konfirmuar rastin e parë të infektimit me koronavirus, duke krijuar frikë dhe panik për përhapjen e tij në Europë.
Ministria Rajonale e Shëndetësisë në Bavari njoftoi në orët e vona të së hënës se pacienti është një burrë nga qyteza Starnberg, e cila shtrihet rreth 30 kilometra në jugperëndim të Mynihut.
Zyrtarët thanë se pacienti ndodhet në gjendje të mirë, është izoluar dhe po vëzhgohet nga mjekët. Ministria nuk dha informacione për përkatësinë e tij etnike.
“Njerëzit që kanë qenë në kontakt me të janë informuar për simptomat e mundshme, masat higjienike dhe kanalet e transmisionit”, thuhet në njoftimin e kësaj ministrie.
Numri në rritje i vdekjeve erdhi ndërsa kryeqyteti kinez gjithashtu njoftoi vdekjen e parë nga sëmundja që ka prekur më shumë se 4,000 njerëz.
Kryeqyteti i Kinës regjistroi sot rastin e parë nga koronavirusi ndërsa përpiqet të përmbajë një sëmundje që përhapet me shpejtësi që ka ngjallur alarmin global.
Raste të këtij virusi tashmë janë regjistruar edhe në shumë shtete të tjera, përfshirë Japoninë, Francën, Australinë dhe Shtetet e Bashkuara.
g.kosovari
