Është mbyllur në barazim pa gola takimi i parë i turit të parë kualifikues së UEFA Europa Leage, mes Partizanit dhe ekipit sllovak Slovan Bratislava. Një ndeshje në të cilën të kuqtë, ndonëse me një formacion më të dobët se ai me të cilin u përballën në kampionat, teksa nuk kishte asnjë nga dy sulmuesit, Raçiç apo Sukaj, ka mundur të rrezikojë portën kundërshtare, më shumë se sa kanë bërë miqtë. Këta të fundit, për zgjedhje të tyre, apo pamundësi, kanë rrezikuar vetëm një herë, në minutën e parë shtesë, portën e mbrojtur nga portieri dhe kapiteni i Partizanit, Alban Hoxha. Për fatin e mirë të këtij të fundit, topi ka goditur shtyllën. Pas rezultatit 0-0 në këtë takim të parë, por njëherësh bazuar edhe në performancën e servirur nga të dy ekipet, gjithçka mbetet e hapur, për tu vendosur në ndeshjen e kthimit që do të zhvillohet në Sllovaki. Aty, ku të kuqtë, mund të konsiderohen të favorizuar, teksa në shtëpi ditën të ruajnë të paprekur portën. Partizani-Slovan Bratislava 0-0.
Pjesa e Parë
Partizani ishte ekipi i parë shqiptar që çeli siparin e përfaqësimit europian për këtë vit. Të kuqtë e nisën këtë sfidë me një formacion të dobësuar nga ai me të cilin mbylli sezonin, teksa në vijën e sulmit nuk do të jetë as Sukaj dhe as Raçiç. Për të ndezur ofensivën e kuqe, në vijën e parë janë pozicionuar Torasa, Ramadani dhe Fili. Një pjesë e parë, që sikurse rezultati 0-0, nuk ka servirur thuajse asnjë rast për gol. Partizani-Slovan Bratislava 0-0, ishte e vlefshme për turin e parë kualifikues të UEFA Europa League.
Pjesa e Dytë
Skuadra e Partizanit, racionale në ofensivën e saj, pa dashur të krijojë hapësira boshe në mesfushë dhe në mbrojtje ka rezervuar masivisht tentativat e saj kryesore për në 10 minutat e fundit të lojës. Në këtë fraksion loje, të kuqtë kanë rrezikuar në mënyrë flagrante portën e Slovan Bratislava, dy herë me Filin dhe një herë me Vilën. Ndërkohë që në minutën e parë shtesë, porta e Partizanit u rrezikua ndjeshëm, teksa topi ka goditur shtyllën, por pa cënuar barazinë në rezultat, 0-0. Partizani-Slovan Bratislava 0-0. Ndeshja e kthimit do të luhet në Sllovaki, më datë 07.07.2016./Telesport/a.m.
Partizani-Slovan Bratislava 0-0
Partizani: Hoxha (C), Arapi, Krasniqi, Fili, Batha, Ramadani, Trashi, Ibrahimi, Torassa, Vila, Kalari.
Trajner: Klevis Dalipi
Slovan Bratislava: Mucha (C), Sekulič, Burnet, de Kamps, Lásik, Zreľák, Soumah, Ligeon, Saláta, De Sa.
Trajner: Nikodimos Papavasiliou Gjyqtarë: Erez Papir, Dvir Shimon, Kiril Balikin (ISR)
