Presidenti ukrainas Volodymyr Zelensky pritet të mbërrijë këtë të hënë, më 8 dhjetor, në Downing Street, ku do të zhvillojë një takim të rëndësishëm me kryeministrin britanik Keir Starmer, presidentin francez Emmanuel Macron dhe kancelarin gjerman Friedrich Merz.
Ky takim vjen në një moment kritik, ndërsa SHBA-të po shtyjnë Kievin dhe Moskën drejt një marrëveshjeje paqeje që përfshin lëshime territoriale. Bisedimet do të fokusohen tek negociatat e paqes dhe hapat e ardhshëm për t’i dhënë fund luftës.
Siç shkruan BBC, aleatët evropianë duan të sigurojnë që çdo marrëveshje të përfshijë garanci të forta sigurie, për të shmangur një sulm të ardhshëm rus.
Britania dhe Franca po udhëheqin përpjekjet për krijimin e një koalicioni të të gatshmëve (Multinational Force Ukraine), që mund të ofrojë mbështetje mbrojtëse në terren.
Takimi i nivelit të lartë vjen pas tre ditësh bisedimesh në Florida, ku negociatori kryesor i Zelensky-t kërkoi ndryshime në planin e Shtëpisë së Bardhë, i cili shihet si i favorshëm për Kremlinin.
SHBA-të dhe Ukraina thanë se kishte përparim, por presidenti amerikan Donald Trump u duk se e kritikoi Zelensky-n të dielën, pasi tha se ai “nuk e ka lexuar” draftin e marrëveshjes.
Ai shtoi: “Populli i tij e pëlqen… (Rusia) do të donte të kishte gjithë vendin nëse e mendon, por Rusia, mendoj se është dakord me të, por nuk jam i sigurt që Zelensky është dakord.”
Negociatat mbeten të ndërlikuara sidomos për çështjen e lëshimeve territoriale dhe kontrollin e centralit bërthamor të Zaporizhzhias.
Zelensky tha se do të informohet personalisht nga kryenegociatori Rustem Umerov në Londër ose Bruksel, duke theksuar se “disa çështje mund të diskutohen vetëm ballë për ballë”.
Ai e përshkroi dialogun me të dërguarin special Steve Witkoff dhe Jared Kushner si “konstruktiv, por jo të lehtë”.
Ministri britanik Pat McFadden paralajmëroi se çdo marrëveshje duhet të garantojë që Ukraina të vendosë vetë për të ardhmen e saj, jo të mbetet në duart e një “organizate pa dhëmbë”.
Liderët evropianë kanë kundërshtuar versionet e hershme të planit amerikan, duke i cilësuar tepër të favorshme për Rusinë. Ata kërkojnë një zgjidhje që të mos dëmtojë interesat afatgjata të kontinentit.
Ndërkohë, Kremlini ka bërë të qartë se nuk është i gatshëm të heqë dorë nga kërkesat kryesore, përfshirë ndalimin e çdo rruge të ardhshme për anëtarësimin e Ukrainës në NATO. Presidenti Putin ka përsëritur se lufta do të vazhdojë deri në marrjen e plotë të rajoneve Donetsk dhe Luhansk, të cilat aktualisht kontrollohen rreth 85%.
