Pjesa më e madhe e vendeve europiane ashpërsuan masat kundër përhapjes së koronavirusit, teksa shifrat ditore vijojnë të jenë të larta.
Vendimi i qeverisë spanjolle për futjen në karantinë të gjithë Madridit dhe 9 qytezave përreth është kundërshtuar ashpër nga autoritetet rajonale.
Kabineti Sançez kërkoi që karantina të nisë të zbatohet brenda 48 orëve teksa shifrat e infektimeve ditore kanë arriur rekorde absolute duke e bërë kryeqytetin vatrën më të nxehtë të pandemisë në vend.
Por sipas autoriteteve rajonale, një karantinë e dytë është e papërballueshme për ekonominë lokale.
Qeveria britanike vendosi mbylljen e bareve dhe restoranteve në disa qytete të mëdha si Liverpuli, ku në disa zona banorëve nuk u lejohet dalja nga shtëpia. Kryeministri Boris Xhonson tha se vendi duhet të jetë i përgatitur për një shpërthim të dytë të pandemisë.
Pas Çekisë, edhe Sllovakia shpalli gjendjen e emergjencës që nis nga java e ardhshme. Dy vendet po përballen me shifra të larta infektimesh ditore.
Izraeli shënoi një rekord të ri absolut infektimesh ditore me afro 9 mijë raste të reja. Kryeministri Benjamin Netanjahu tha se karantina mund të zgjasë edhe për një vit të plotë.
/a.r
