Eurodeputetja Eleni Theocharous vijon të sulmojë shtetin shqiptar dhe kryeministrin Edi Rama për vrasjen e ekstremistit grek, Kostandinos Kaçifas. Ajo u shpreh se ky i fundit do ta paguajë vrasjen e ushtarakut grek, pasi Athina ka përgjegjësi ndaj grekëve kudo që ata jetojnë. Theocharous u shpreh më tej për mediat greke se është e bindur që në ‘Epirin e Veriut’ bëhet spastrim etnik.
Eurodeputetja Eleni Theocharous, e cila është shpallur nga Shqipëria ‘non grata’, ka paralajmëruar kryeministrin Edi Rama se do të paguajë një çmim të rëndë përkundrejt vrasjes së ekstremistit grek, Kostandinos Kaçifas. Ajo është shprehur përgjatë një interviste për mediat greke se “Athina ka përgjegjësi kombëtare, historike, morale dhe politike ndaj të gjithë grekëve kudo që ata jetojnë, përfshirë këtu edhe ata të ‘Epirit të Veriut’ ”.
Duke komentuar vrasjen e Konstandinos Kaçifas, eurodeputetja qipriote ka theksuar se grekët që jetojnë në Epirin e Veriut jetojnë nën shtypje dhe terror. “Kaçifas me veprimin e tij u bë i rrezikshëm. Ai po fliste, luftonte, nuk kishte frikë; pra, ai duhej të heshte. Rama nuk arriti të na trembë. Sepse ne ishim të gjithë atje”, komentoi ajo.
Eleni Theocharous shprehu bindjen se në “Epirin e Veriut” po bëhet spastrim etnik, e pikërisht për këtë arsye, eurodeputetja i kërkoi qeverisë greke që të ofrojë mbështetjen e saj ndaj minoritetit në fjalë. “Ajo duhet të mbështesë çdo biznes të vogël të ‘Epirit të Veriut’, të japë status të privilegjuar për produktet e tyre. Të dërgojë vizitorë në zonat historike dhe turistike të ‘Epirit të Veriut’. Të rinjtë të shkollohen në universitetet greke me çmime të lira dhe të kthehen dhe të punojnë për vendin e tyre për të paktën 5 vjet”, u shpreh ajo. Theocharous tha më tej se Greqia tanimë duhet të kishte pezulluar çdo proces integrimi të Shqipërisë në Bashkimin Europian.
Kjo nuk është hera e parë e eurodeputetes qipriote që shprehet e revoltuar ndaj vendit dhe kryeministrit Edi Rama. Fill pas vrasjes së ekstremistit grek, Konstandinos Kaçifas në Bularat të Gjirokastrës nga forcat RENEA, Theocharous e ka cilësuar shtetin shqiptar si një vend që dhunoi të drejtat e njeriut dhe kryeministrin Edi Rama si ‘kryeministër të korrupsionit’ “.
Eleni Theocharous u shpall më datë 10 nëntor si një person ‘non grata’ në Shqipëri, përmes një vendimi që u njoftua Ministria e Jashtme shqiptare. Kjo e fundit e argumentoi vendimin e saj si një vendim të marrë për pasojë të shfaqjeve të përsëritura ekstremiste. Ndaj këtij vendimi, ajo ka reagoi duke thënë se ndihet e nderuar për këtë vlerësim. (Shqiptarja.com)
