Euro ka kapur nivelet minimale historike në raport me lekun duke u këmbyer sot me mesatarisht 99.72 lekë sipas të dhënave të Bankës së Shqipërisë.
Ky kurs këmbimi i lekut me euron nuk është shënuar asnjëherë që prej ditës që euro nisi të përdorej si monedha zyrtare e Bashkimit Europian.
Euro ka qenë në pozita të dobta në raport me lekun gjatë viteve të fundit, por monedha europiane ka humbur ndjeshëm pikë që prej nisjes së sezonit turistik në vend duke favorizuar ndjeshëm ata që importojnë mallra nga Bashkimi Europian, ndërsa janë të dezavantazhuar bizneset që eksportojnë mallra si edhe familjet që jetojnë me dërgesat e të afërmve emigrantë.
Dollari amerikan gjithashtu paraqitet në pozita të dobta ndaj lekut duke u këmbyer sot mesatarisht me 90.33 lekë, ndërsa paundi britanik këmbëhet me mesatarisht 117.05 lekë duke shënuar një forcim të lehtë në raport me lekun kundrejt javës së kaluar.
/a.r
