Përkrah Sokol Cikalleshit, në konferencën për shtyp në vigjilje të dy takimeve kualifikuese të Euro 2020 doli edhe lojtari më i ri i kombëtares, Lindon Selahi.
20 vjeçari i cili aktivizohet me Twente në Holandë tregoi emocionet e para me fanellën kuqezi, teksa zbuloi edhe mundësinë për të luajtur me Belgjikën, të cilën e ka refuzuar për shkak se e ndjen veten shqiptar.
“Mendoj se e kam merituar këtë ftesë. Që i vogël ka qenë dëshira ime që të luaj në Kombëtare. Jam më i vogël por shpresoj që të luaj, trajneri vendos në fund dhe mendoj se jam gati. I njoh disa nga futbollistët, pasi kemi luajtur tek U-21.
“Kur kam qenë i ri kam luajtur me Belgjikën sepse nuk më ka ftuar Shqipëria, por tani që më thirri Shqipëria e vendosa. Edhe tani më ka kërkuar Belgjika, por kur e ndjen veten shqiptar, shkon 100% te Shqipëria. Ka pasur moment që nuk kanë qenë mirë por tani jemi mirë. Mendoj se kemi shans për të kaluar dhe në Turqi e Moldavi shkojmë për të fituar dhe për të luajtur mirë.
“Mund të luaj kudo në mesfushë por mund të luaj më mirë si numër 8. Nuk e kam problem edhe si “6” apo “10”. Për momentin jam në sezonin parë te Tuente por jam mirë. Nuk po shoh lart por jam mirë. Ëndrra ime është të luaj sa më shumë minuta dhe të luaj me Kombëtaren. Ëndrra është të kualifikohemi dhe të fitojmë në Kupat e Europës,” përfundoi Selahi.
Futbollisti i lindur në Namur të Belgjikës pritet të jetë një element i rëndësishëm për skemat e trajnerit, Edi Reja, që mund t’i rezervojë minuta në këmbë 20 vjeçarit për duelet ndaj Turqisë më 11 tetor dhe kundër Moldavisë tre ditë më vonë. Më parë, Selahi është aktivizuar për kombëtaren U-21 të drejtuar nga Alban Bushi, teksa ky grumbullim është i pari në kombëtaren A.
g.kosovari
