Nga Ben Andoni
“Shqiptarë, ejani përsëri”, titulli-slogan i një gazete të huaj është pritur me shpoti nga shumë vende evropiane, që njësoj si Shqipëria kanë përcjellë tabore të tëra tifozësh në Francë. Dhe nuk kishin faj, pasi nuk mund të mendonin kurrë se tifozët e një vendi që i kishin përfolur dhe damkosur për trazirat e vitit ’97 kur i kanë parë me fytyrat e vrara, të egërsuara dhe plot urrejtje, janë protagonistë të festës franceze të futbollit evropian.
Ky stereotip ka vijuar me vite e vite të tëra për gati dy dekada, ku shqiptarët iu mbahej mënd vetëm kallashnikovi, ulërimat, krismat dhe fytyrat e egra. Ndërsa në Europian kanë kuptuar se të gjitha ekipet janë shumë larg Shqipërisë, mu prej këtyre fytyrave tashmë të transformuara në plot ngazëllim dhe dëshirë për fitore. Ca më shumë akoma, ende në këtë sens nuk po e kapin dot Shqipërinë, qoftë edhe vende me tifozeri institucionale, si ekipet e Britanisë së Madhe. Shqipëria me gazin, qytetarinë, gjetjet e rekuizitës dhe mirësinë ka fituar unanimisht trofeun e tifozëve të Euro 2016.
E në të gjithë këtë tollovi me kaq shumë thirrje, lavdime dhe mburrje për fitoren e ekipit tonë në Francë 2016, tek-tuk kritika, për një gjë vetë shqiptarët do jenë krenarë dyfish, pasi edhe zyrtarisht kemi hequr zulmën e keqe të vitit 1997. Madje, edhe të huajt e shumë, mediat e ndryshme, dashakeqë, opinion bërës për një gjë nuk dyshojnë më: shqiptarët-tifozë janë evropianë të këndshëm. Në ditët e festivalit të futbollit ata kanë shpikur lloj-lloj koreografish, rekuizita që nga qesharake por edhe shumë të gjetura, e janë shpërfaqur me fytyra tejet simpatike dhe shumë sportivitet.. .Atë që Evropa po e kërkon me shumë sforcim në mes të urrejtjes patologjike të rusëve apo tifozerive të tjera tejet armiqësore, përveç britanikëve që tashmë edhe zyrtarisht lëkunden mes qenies apo jo në kontinent, e ka gjetur te shqiptaro-kosovaro-maqedonasit dhe malazezët, me linjën e përbashkët etnike dhe një simboli të përbashkët shqiponje.
Ndërkohë tifozeria i ka bërë mirë dhe politikës shqiptare që e ka venitur disi gjuhën e urrejtjes përkohësisht duke futur armët nën mëngë, për ditët në vijim. Pa harruar që në Shqipëri për kapriçio një reformë e rëndësishme për fatet e vendit nuk po merr dot jetë, si ajo e Drejtësisë , kurse në Kosovë e Maqedoni palët shqiptare urrehen deri në armiqësi me njëra-tjetrën.
Pra, ndërsa, tifozët shqiptarë ia hoqën vendit zullumin e vitit 1997, politikanëve me sa duket do u duhet ende shumë e shumë kohë, për të hequr llumin, që e prodhojnë kurdo dhe që është gati të ndyjë çdo gjë, përveç Euro 2016, ku protagonistët e vërtetë janë shqiptarët e thjeshtë, ata që duan reformat dhe vendin e tyre dhe jo retorikën boshe që prodhon Tirana dhe Prishtina politike mbushur me urrejtje patologjike. Ndaj bota kur u drejtohet, shkruan thjesht “Shqiptarë hajdeni sërish!”
