COVID-19, jo vetëm që mbetet prezent në vendin tonë, por aktualisht është virusi mbizotërues që po qarkullon. Drejtoresha e Përgjithshme e ISHP-së, Eugena Tomini, e ftuar në emisionin “Mirëmëngjes Shqipëri” tha se COVID është prezent gjatë gjithë kohës dhe se nënvarianti i Omicron, XFG është ai që mbizotëron në rreth 90% të rasteve. Nga ana tjetër, Tomini thekson se nuk ka asnjë rast të konfirmuar me grip.
“COVID nuk është ndalur asnjëherë gjatë gjithë periudhës vjetore. COVID nuk është më si gripi apo infeksionet e tjera respiratorë me të cilat ne jemi mësuar që të përballemi me një tendencë në rritej apo në ulje, ndërsa COVID është prezent gjatë gjithë kohës. Aktualisht kemi mbizotërim në COVID në qarkullim. Nënvarianete e Omicron po sundojnë në të gjithë botën, por XFG është një nga variantet e Omicron që po sundon në 83-90% të rasteve. Nuk kemi asnjë rast të konfirmuar me grip, arsye tjetër e rëndësishme pse vaksinimi duhet të kryhet në kohë. COVID është në fazën e tij mëse normale edhe pse shihet një tendencë në rritje. Nuk besoj që do ta largojmë nga lista e viruseve respiratorë që do qarkullojnë, jo vetëm gjatë gjithë vitit, por do të bashkë qarkullojë edhe me viruset e tjera në sezon”, u shpreh Tomini.
Ajo i bën thirrje qytetarëve që të monitorojnë gjendjen shëndetësore në rast infektimi, pasi COVID ka edhe forma të rënda. Nëse simptomat zgjasin më shumë se 3-4 ditë, Tomini këshillon që të kërkohet ndihmë mjekësore.
“Agresiviteti i fazës fillestare të pandemisë nuk është, por COVID ka forma të rënda me prekje pulmonare dhe pamjaftueshmëri të mushkërisë për të marrë frymë dhe për të nxjerrë frymë. Nuk duhet nënvlerësuar në asnjë moment. Monitorimi i gjendjes shëndetësore është tepër i rëndësishëm. Ky lloj kontakti nuk duhet humbur asnjëherë sepse infeksionet respiratorë e shfaqin agresivitetin në mënyrë të papritur. Nëse simptomat zgjasin më shumë se 3-4 ditë, atëherë duhet të kërkojmë ndihmë mjekësore. Nuk duhet të përdorim antibiotikë, viruset kërkojnë antiviral”, thekson ajo.
