Eufori budalle kundër SPAK-ut

Nga Denis Dyrnjaja

Lajmi se qeveria amerikane ngriu të gjitha fondet për vendet e tjera ku përfshihet edhe Shqipëria, e ndër shumë institucione shqiptare preken edhe Prokuroria dhe Gjykata e Posaçme, po përcillet me një lloj entuziazmi naiv, kryesisht nga lajmësit afër politikës dhe veçanërisht asaj kategorie politikanësh që janë prekur ose presin të përballen me drejtësinë. Duket një ngazëllim thuajse idiotesk, për ata që mezi ç’presin që këto instrumente gjyqësore që prodhoi reforma në drejtësi të ndalen, pasi ajo që ishte projektuar dhe paraperceptuar politikisht kur u miratua me 140 votat absolute të Parlamentit në vitin 2016, zor se po u pëlqen për atë që po prodhon ligjërisht e penalisht sot në realitet.

Me një mori dosjesh të shumta nën hetim të politikës, si nga mazhoranca dhe nga opozita dhe me kokëçarje të mëdha për stresin që ka krijuar SPAK-u si organi kyç i hetimit dhe provave për korrupsionin në linjat e politikës, tani duket se të gjithë, kush heshtur e kush jo, kush direkt e kush indirekt e shohin opsionin e ndalimit të “marshimit” të prokurorëve të Dumanit si një lajm të shumëpritur. Imagjinoni në një qiell me rrufe, furtunë, erë e shi, të shfaqet një rreze dielli si shpresë për shpëtim dhe liri kur mendon se ndërkohë ke aq shumë pasuri, por ose ndodhesh ose mendon se do përfundosh në qeli.

E njëjta shpresë është ndezur edhe nga bota e krimit të organizuar se dhe andej pështjellim të madh ka krijuar SPAK-u me hetime e sekuestrime. Por e vërteta qëndon krejt ndryshe dhe në fakt e rrejshme për shpresën e atyre që mendojnë se SPAK-u dhe Gjykata Speciale, nuk do të mund të vazhdojnë funksionin e tyre për shkak të ngrirjes së mbështetjes financiare nga SHBA. Vërtetë qeveria amerikane përmes programeve të ndihmës ka kontribuar financiarisht në mbështetje të drejtësisë shqiptare, por ky kontribut ka ardhur më shumë për të dhënë mesazhin e përkrahjes ndaj këtyre strukturave, sesa ka qenë bazik dhe jetik për ekzistencën e tyre.

Është detyrim kushtetues i qeverisë dhe shtetit shqiptar që të sigurojë financimin e këtyre organeve ligjzbatuese dhe në tërësi pushtetit gjyqësor në Shqipëri. Dhe nëse ka ndonjë vakum financiar nga bllokimi i fondeve të akorduara nga qeveria amerikane për Prokurorinë dhe Gjykatën e Posaçme, qeveria përmes një akti normativ bën kompensimin buxhetor që nevojitet dhe gjithçka vazhdon funksionin pa patur asnjë pengesë apo ndalesë. Madje ky është rasti kur Kryeministri Rama provon se e kishte seriozisht atë punën e Noc Rrokut.

Nga ana tjetër dhe vetë këto dy organe të një pushteti të pavarur gjyqësor kanë dhe mund të krijojnë burime alternative financiare. Psh asetet financiare apo pasuritë e paluajtshme që konfiskohen nga shteti për llogari të vendimeve të Gjykatës së Posaçme mund të administrohen dhe të kalojnë në mbështetje të aktivitetit të vetë këtyre strukturave. Janë me miliona euro pasuri të sekuestruara të cilat, mund dhe duhet të gjenerohen si të ardhura në mbështetje të SPAK-ut. Se në fakt kushdo blinte në ankand, automjetin, apartamentin apo truallin e një personazhi të botës së krimit?!

Vështirë të gjendeshin individë që të kishin kurajo të merreshin me siklete të këtij lloji. Ndaj këto asete do të duhej të shtetëzohen e të vihen në përdorim nga këto struktura të drejtësisë në formën e logjistikës së nevojshme dhe plotësimit të çdo vakumi financiar që prodhohet nga vendimi i ngrirjes se financimit nga Administrata e re e Presidentit Trump apo çdo nevojë tjetër që mund të ndodhë për shumë arsye. Ndërkohë në lidhje me këtë vendim surprizë që ka ndërmarrë Kabineti i z Trump, qeveria shqiptare mund dhe të përdorë simbolikisht reciprocitetin, si një instrument simbolik.

Pra kush mendon se SPAK-u do të ndalet gabon. Të gjitha mundësitë për të zhbërë ecurinë e proceseve gjyqësore për shkaqe të mungesës financiere janë thuajse zero, vetëm nëse do ndodhemi para një skenari ku politika dhe krimi organizuar dakordësohet dhe rakordohet që SPAK-u të bllokohet. Gjithsesi nuk duhet përjashtuar si mundësi dhe mund të ndodhë, jetojmë në Shqipëri ku asgjë nuk është çudi.