Etrit Berisha: Pata shumë punë me Danimarkën, morëm 1 pikë të merituar
Pas barazimit në “Telia Parken”, Etrit Berisha ka dashur ta ndajë me tifozët shqiptarë suksesin e marrjes së një pike. “Një mbrëmje, mund të them, e lodhshme për ne, por njëkohësisht jemi të kënaqur me pikën që morëm këtu në Kopenhagen. Gjithashtu, nuk e lejuam Danimarkën të shkëputet në renditje, duke ruajtur pozicionet me pikë të barabarta dhe duke e lënë të hapur betejën për vendin e dytë në grup”, thotë Berisha.
Ndërkohë që ai ka qenë heroi i mbrëmjes së djeshme, duke bërë disa pritje shumë të bukura dhe duke rezultuar edhe si lojtari më i mirë në fushë i kombëtares tonë. “Kjo ndeshje për ne ishte mjaft e vështirë. Nuk është se bëmë më të mirën tonë, mirëpo, në fund të fundit, kemi marrë një pikë të merituar dhe shumë të vlefshme. Siç e ceka edhe më sipër, objektivi ynë ishte që Danimarka të mos na shkëputej me pikë. Tani na mbetet në ndeshjen tjetër, që të kërkojmë fitoren. Ndaj Portugalisë do të mobilizohemi sa më mirë, që të fitojmë, edhe pse do të jetë një mision shumë i vështirë. Pata shumë punë, sepse Danimarka ka lojtarë shtatlartë, luante me krosime, të cilat adresoheshin nga pozicione të ndryshme në zonën time të portës. Në goditjet nga këndi apo ato standarde ishin mjaft të rrezikshëm dhe u mundova që së bashku me gjithë ekipin ta mbaj portën të parkekur. Jam i gëzuar që e siguruam një barazim të bardhë këtu në Kopenhagen,” tha portieri i Shqipërisë.
