Një 72-vjeçar nga Korça është rasti i parë i konfirmuar në Shqipëri për vitin 2026 me infeksion nga Virusi i Nilit Perëndimor.
I moshuari ndodhet aktualisht në Spitalin Rajonal të Korçës, në kujdesin e mjekëve, ku po merr trajtimin përkatës.
Mësohet se 72-vjeçari është pickuar nga një mushkonjë teksa qëndronte në lulishte dhe pas shfaqjes së simptomave ka kërkuar ndihmë mjekësore. Analizat konfirmuan infektimin me Ethet e Nilit Perëndimor, virus që transmetohet përmes pickimit të mushkonjave të infektuara.
Burime pranë NJVKSH Korçë, bëjnë me dije se rasti është izoluar, pasi familjarët e të prekurit kanë rezultuar negativë në testime. Po ashtu bëhet me dije se pritet të mbërrijë në Korçë një grup pune nga Instituti i Shëndetit Publik, për të bërë verifikimet në terren dhe monitorimin e mushkonjave që mund të jenë bartëse të virusit.)
Në zonën ku është evidentuar rasti pritet të kryhen edhe procedura dezinfektimi, si masë parandaluese. Në Shqipëri, infeksioni nga Virusi i Nilit Perëndimor është dokumentuar edhe në vitet e mëparshme, me 107 raste të konfirmuara në vitin 2024 dhe dy raste në vitin 2025.
