Një tjetër person ka humbur jetën në një spital të Shkupit pasi u infektua me virusin e Nilit Perëndimor, duke e çuar në gjashtë numrin e viktimave nga sëmundja në Maqedoninë e Veriut. Viktima është një 72-vjeçar nga Shkupi, i cili kishte qëndruar i shtruar në spital për 15 ditët e fundit dhe kishte shfaqur një gjendje të rëndë klinike.
Ndërkohë, autoritetet shëndetësore po përballen me shqetësimin për përhapjen e mëtejshme të virusit. Deri tani janë konfirmuar 51 raste, shumica e tyre në zonën e Shkupit.
Shumica e të prekurve janë mbi 60 vjeç, ndërsa disa pacientë kanë shfaqur komplikacione të rënda neurologjike, përfshirë encefalitin dhe meningjitin. Rritja e rasteve në pak javë ka alarmuar autoritetet.
Në fund të korrikut ishin raportuar vetëm 8 raste, ndërsa aktualisht numri ka shkuar në 51. Përmasat e shpërthimit e bëjnë atë një nga situatat më serioze me të cilat është përballur vendi që nga viti 2011, kur virusi i Nilit Perëndimor u regjistrua për herë të parë në Maqedoninë e Veriut.
Si pasojë e përhapjes së virusit, autoritetet kanë shpallur gjendje epidemie në disa komuna të Shkupit. Masat përfshijnë intensifikimin e programeve për kontrollin e mushkonjave dhe forcimin e mbikëqyrjes epidemiologjike.
Virusi i Nilit Perëndimor transmetohet kryesisht përmes pickimit të mushkonjave të infektuara dhe, në shumicën e rasteve, shkakton simptoma të lehta ose nuk shfaq simptoma. Megjithatë, te personat e moshuar dhe ata me probleme të tjera shëndetësore, infeksioni mund të shkaktojë forma të rënda të sëmundjes.
