Eskpertët e ekonomisë e shohin luftën kundër informalitetit si të domosdoshme për të vendosur konkurrencën në treg, por nga ana tjetër, i bëjnë thirrje qeverisë që të jetë më pak radikale në masat që ndërmerr, në mënyrë që të mos godasë bizneset e për rrjedhojë dhe ekonominë e vendit. Këto mesazhe u dhanë gjatë tryezës së Fondacionit për Liri Ekonomike.
“Po ta shohim Shqipërinë në nivel rajonal, për disa sektorë nga më të ndjeshmit, si ai i turizmit apo sektorë të tjerë shërbimesh, përfshirë fasonët ku ne duhet të ishim kompetitivë, ne kemi një nivel taksash më të lartin në rajon”, tha Ardian Civici.
“E gjithë ajo sasi e madhe parash që prodhohet dhe qarkullon në sektorin informal ka më tepër gjasa që të largohet jashtë vendit. Unë këtu e shoh vlerën e formalizimit, nëse arrihet. Tek fakti që nëse formalizohen, këto biznese do ta kenë më të vështirë për ta çuar paranë jashtë vendit”, theksoi Gjergj Buxhuku nga Konfindustria.
“Cilat janë këto lëvizje regresive që e zhvendosin Shqipërinë me 30 apo 40 vende dhe që na çojnë sërish shumë vite më pas në këtë garë të madhe? Faktori kryesor janë lejet e ndërtimit. Por çfarë ka ndodhur me to? Ka ndodhur që nuk jepen më leje ndërtimi, me motivin e vendosjes së kontrollit dhe displinimit të tregut. Por a disiplinohet një treg i hapur përmes ndalimit? Kjo është absurde”, nënvizoi Selami Xhepa.
Tryeza e Fondacionit për Liri Ekonomike në fund të punimeve të saj do të dorëzojë dhe një sërë rekomandimesh për qeverinë.
