Eksportet arritën në 185.7 miliardë lekë për 9-mujorin e këtij viti, duke shënuar rënie me 3.7% në raport me të njëjtën periudhë të një viti më parë, sipas statistikave të publikuara sot nga INSTAT.
Performanca e dobët e “minerale, lëndë djegëse, energji” vijon të jetë faktori kryesor që ndikon në këtë prirje rënëse të eksporteve, ndërsa tekstilet e këpucët po rriten ndonëse me ritme shumë më të ngadalta se një vit më parë.
Grupet e tjera janë në përmirësim, të ndjeshëm, sidomos “pijet, ushqimet e duhani” dhe “makineri e pajisje”, por pesha e tyre e vogël, në raport me totalin, bën që ato të mos kenë ndikimin në trendin e përgjithshëm të eksporteve.
Eksportet e “minerale, lëndë djegëse, energji” ranë me 22%, në 52.3 miliardë lekë, duke ngadalësuar ritmet e rënies në raport me gushtin (në gusht, kompania Bankers Petroelum shtyu nisjen e një anijeje, çka ndikoi në rënien e fortë të eksporteve atë muaj). Koniunktura e pafavorshme ndërkombëtare, sidomos për naftën, është arsyeja kryesore e rënies, teksa operatorët nuk kanë interes të prodhojnë e eksportojnë, kur çmimet kanë prekur fundin. Edhe importet e energjisë janë në rënie, për shkak të rritjes së prodhimit vendas dhe motit të pafavorshëm. Beralb, prodhuesi i kromit pezulloi aktivitetin në shtator.
Eksportet e tekstile e këpucëve u rritën me 2.7% në gati 66.9 miliardë lekë për 9-mujorin, duke qenë grupi më i madh i eksportuar në vend me 36% të totalit (një vit më parë kryesonin lëndët djegëse e energjia me 35% të totalit). Ndonëse ky grup e ka marrë veten, pas rënies në muajt e parë të vitit, sërish ai mbetet larg rritjeve dyshifrore që u panë vitin e kaluar. Aktorët e tregut pohojnë se rritja e ndjeshme e kostove të aktivitetit po e bën këtë industri më pak konkurruese, ndërkohë që kërkesat nga partnerët e huaj nuk po mungojnë.
Materialet e ndërtimit dhe metalet ndaluan rritjen, për 9 mujorin, si rrjedhojë e performancës së keqe në shtator, duke rezultuar me eksporte prej 28 miliardë lekësh, për periudhën janar-shtator.
Eksportet e ushqimeve, pijeve e duhanit kanë shënuar rritjen më të madhe në vlerë absolute për 9-mujorin, duke u zgjeruar me gati 3.1 miliardë lekë, apo 28%, për të arritur në 14 miliardë lekë.
Edhe eksportet e makinerive dhe pajisjeve kanë vijuar ecurinë pozitive, ndonëse me ritme më të ulëta se në pjesën e parë të vitit, duke u zgjeruar me 33% në 8.6 miliardë lekë.
Eksportet e drurit dhe letrës, një grup që u rrit me ritme dy shifrore vitin e kaluar ka rezultuar me rënie këtë vit, duke u ulur me 8.2% për 9 mujorin, në 6 miliardë lekë.
Edhe grupi i makinerive e pajisjeve të këmbimit vijoi rritjen, duke u zgjeruar me 42% në 7.7 miliardë lekë, si rrjedhojë e rritjes së aktivitetit të fasonit industrial. Megjithatë, në gusht, ai pa për herë të parë një rënie të lehtë me bazë vjetore.
Për 9-mujorin, grupi më i eksportuar ishin tekstilet e këpucët, me 36% të totalit, ndërsa “Mineralet, lëndët djegëse e energjia” kanë zbritur në vendin e dytë me 25% të totalit, nga 35% që zinin për të njëjtën periudhë të një viti më parë.
Shtator, eksportet ranë 4.4%
Sipas INSTAT, në muajin Shtator 2015 eksportet e mallrave arritën vlerën 20 mld lekë, duke u ulur me 4,4 % në krahasim me Shtator 2014 dhe duke u rritur me 32,6 % në krahasim me Gusht 2015. Importet e mallrave në muajin Shtator 2015 arritën vlerën 44 mld lekë, duke u ulur me 7,4 % në krahasim me Shtator 2014 dhe duke u rritur me 9,4 % në krahasim me Gusht 2015. Deficiti tregtar i këtij muaji është 24 mld lekë, duke u ulur me 9,9 % krahasuar me Shtator 2014 dhe 5,0 % në krahasim me Gusht 2015. Monitor/
