Analisti Albatros Rexhaj, i ftuar në studion e emisionit “Off the Record” nga Andrea Danglli, foli mbi përplasjet e fundit mes kryeministrit Edi Rama dhe institucioneve të drejtësisë.
Diskutimi u përqendrua te kufijtë kushtetues dhe proceduralë të prokurorisë, si edhe te mundësia teorike e pezullimit të një kryeministri nga detyra në kuadër të një hetimi penal.
Rexhaj mbajti një qëndrim të prerë, duke e cilësuar një skenar të tillë si të papranueshëm dhe jashtë standardeve institucionale.
“Ku mund të ketë të drejtë një prokuror të pezullojë kryeministrin? Është puç, është grusht shteti,” u shpreh ai gjatë debatit.
Sipas analistit, ndonëse ngritja e një aktakuze është një procedurë e parashikuar nga ligji dhe mund të zbatohet ndaj çdo funksionari të lartë, përfshirë kryeministrin apo presidentin, pezullimi nga detyra përbën një akt procedural që, në vlerësimin e tij, nuk mund të vendoset nga një prokuror apo nga një kombinim prokuror–gjyqtar.
“Ngritja e një aktakuze që i qëndron të gjitha filtrave të drejtësisë mund t’ia bësh kryeministrit, presidentit, kujt të duash. Por pezullimi është një akt procedural. Nuk mund të bëhen bashkë një prokuror dhe një gjyqtar e të pezullojnë kryeministrin,” theksoi Rexhaj.
