“Është përjashtuar, s’është më pjesë e PD”/ Reagon Bardhi: Ndërhyrja në punët e brendshme të grupit, akt i pashembullt…!

Kryeparlamentarja Lindita Nikolla ka lexuar njoftim drejtuar Kuvendit nga kryetari i Partisë Demokratike, Lulzim Basha.

Në njoftim, Basha deklaronte se Gazment Bardhi nuk është më pjesë e PD, me vendim të kryesisë, pasi i ka mbaruar anëtarësia.

“Mbi përbërjen e grupit parlamentar i PD, Zoti Gazment Bardhi nuk është më pjesë e Grupit Parlamentar të PD, nga data 09/10/2023, si pasojë e mbarimit të afatit të anëtarësisë”, thuhej ndër të tjera në njoftimin e lexuar nga Nikolla.

Ndërkohë në lidhje me këtë ka reaguar edhe Gazment Bardhi, i cili thotë se ndërhyrja në punët e brendshme të PD është një akt i pashembullt.

“Nervozizmi i Edi Ramës për unifikimim e qëndrimit të Shqipërisë me atë të Kosovës, nuk u shfaq vetëm me mungesën e tij skandaloze në votimin për Rezolutën për dënimin e Serbisë, por edhe nga sjellja e paprecedentë e Kryetares së Kuvendit në fund të seancës së sotme të posaçme.

Marrja peng nga Edi Rama e Reformës Zgjedhore dhe rrëzimi i Komisioneve Hetimore të kërkuara nga opozita, si dhe ndërhyrja në kundërshtim me Rregulloren e Kuvendit e Kryetares së Kuvendit në punët e brendshme të grupit parlamentar të PD, përbën aktin më të pashembullt në historinë e pluralizmit politik që mbyll çdo hapësirë institucionale për opozitën në Parlament”, tha Bardhi./m.j