Komisioni i Ekonomisë ka rrëzuar dekretin e Presidentit Ilir Meta për kthimin e ligjit për Buxhetin 2022 në Kuvend.
Në mbledhjen e zhvilluar pasditen e sotme, shumica ka votuar kundër dekretit të Kreut të Shtetit për kthimin e buxhetit.
Në argumentet që jep kreu i shtetit, thotë se “në tërësinë e tij është një plan financiar antisocial, ka mangësi shqetësuese të transparencës në lidhje me shpenzimet dhe politikat fiskale; paraqet problematikë shumë shqetësuese në lidhje me nivelin e borxhit publik, përdorimit dhe efektit ekonomik të tij; mungon mbështetja reale për sektorët e ekonomisë dhe në mënyrë të veçantë për bujqësinë; mungon mbështetja e nevojshme buxhetore për shtresat në nevojë për kurimin ndaj infeksionit Covid-19, të cilët trajtohen në shtëpi dhe jashtë sistemit spitalor”.
Presidenti Meta dekreton ligjin për akcizat
Presidenti i Republikës, Ilir Meta, ka dekretuar me shpallje ligjin nr. 114/ 2021 “Për disa ndryshime dhe shtesa në ligjin për akcizat në Shqipëri.
Në njoftimin e Presidencës thuhet se ky ligj u vendos të shpallej nga Presidenti Meta, pasi synon konsolidimin e të ardhurave nga akciza.
Njoftimi i Presidencës:
Presidenti i Republikës, Sh.T.Z. Ilir Meta, ka dekretuar me shpallje ligjin nr. 114/2021 “Për disa ndryshime dhe shtesa në ligjin nr. 61/2012, “Për akcizat në Republikën e Shqipërisë”, të ndryshuar”.
Ky ligj u vendos të shpallej nga Presidenti i Republikës, për sa kohë synon konsolidimin e të ardhurave nga akciza, nëpërmjet përafrimit të tyre gradual me nivelin e akcizave të parashikuara në Direktivat e Bashkimit Europian, si dhe moslejimin e hapësirave ligjore për shmangie nga pagesa e akcizës, duke shfrytëzuar shkallët e diferencuara të saj për përdorues të ndryshëm./m.j
