Erzen Breçani, ish-nëndrejtori i Policisë së Tiranës ka rrëfyer mbrëmë në “Opinion” se si e ka arrestuar dy herë Emiljano Shullazin.
Herën e parë në 2011, ai tha se e kishte bërë me aktmotivim pasi kishte penguar disa kandidatë socialistë dhe drejtues të pushtetit vendorë që të kryenin veprimtaritë e tyre.
“Dy deputetë të PSsë, Besnik Bare dhe Vasilika Hysi, më kërkuan arrestimin e tij. Pasi u thashë që të bënin kallëzim, shkova dhe e arrestova me iniciativë të lirë, pa pyetur Prokurorinë. Kam qenë me automjetin tim dhe s’pata asnjë problem”, shtoi Breçani.
Ai tregoi më pas se njerëz si Shullazi nuk e kundërshtojnë Policinë, pasi janë të sigurt se mund të dalin prej arrestimit.
Erzen Breçani ka rrëfyer edhe lidhjet politike të Emiljano Shullazit. Një nga këto momente sipas Breçanit ka qenë edhe ditën e zgjedhjeve të 23 qershorit 2013, ku një telefonatë në sallën operative, bënte me dije se Emiljano Shullazi dhe shokët e tij, kishin dalë në kundërshtim me ligjin për zgjedhjet, me flamuj të Partisë Socialiste dhe LSI-së. Po sipas Breçanit, ka pasur ndërhyrje nga të majtët që të lirojnë Shullazin dhe ai vetëm për shkak të këtyre ndërhyrjeve e ka mbajtur 10 orë të ndaluar.
