Sheshi kryesor i Ersekës u mbush me mijëra qytetarë, të cilët ndoqën mbrëmjen përmbyllëse të turit të njohur “Verë dhe Portokalle”. Pas ndalesave në qytete të ndryshme të vendit, Kolonja shënoi stacionin e fundit të këtij sezoni.
Performanca e kastit të aktorëve të dashur të humorit krijoi menjëherë një atmosferë festive. Brenda pak minutash, hapësira qendrore e qytetit u shndërrua në një skenë të mbushur me të qeshura dhe duartrokitje.
Me ovacionet e gjata të publikut kolonjar dhe me premtimin për rikthim me surpriza të reja verën e ardhshme, “Verë dhe Portokalle” mbylli një tjetër edicion të suksesshëm. Turi la pas momente të këndshme, humor dhe dëshirën e publikut për t’u ritakuar përmes ekranit.
