Peshëngritësi Erkand Qerimaj ka mbyllur garimin e tij në Kampionatin Europian të Shtangës që po zhvillohet në Batumi të Gjeorgjisë, duke konkurruar në peshën 81kg. Shkodrani garoi në Baterinë B, ku në dygarësh u rendit në vendin e dytë, me 347kg në total. Gjithsesi, gara e kësaj peshe nuk ka përfunduar ende, pasi në mbrëmje zhvillohet Bateria A, ku Shqipëria do të përfaqësohet me Daniel Godelli.
Në stilin e shkëputjes, Qerimaj i realizon me sukses të trija provat. Fillimisht ai ngre lart peshën 155kg e më pas 157kg dhe në fund 159kg. Shkodrani renditet në vendin e dytë të Baterisë B në këtë stil.
Në stilin e shtytjes, Qerimaj e nis mirë garën, duke ngritur 188kg, duke siguruar që në këtë provë të parë kreun. Më pas tentoi 193kg, por pa sukses, ndërkohë që në provën e tretë tenton 194kg, por sërish dështon.
Qerimaj e mbyll stilin e shtytjes në vendin e parë, me 188kg, ndërsa në dygarësh ai u klasifikua në vendin e dytë, me 347kg. Sot në darkë do të zhvillohet Bateria A e peshës 81kg, ku garon edhe Daniel Godelli, që synon zonën e medaljeve.
