Nga Altin Ketro
Në orën 20:00 të datës 20 qershor, Bulevardi i Ri i Tiranës starton në 500 metrat e parë të tij. Nuk janë shumë, sepse ka ende punë për ta përmbyllur të tërin, por sidoqoftë është shenjë e fortë se kur punohet me vullnet e pasion, gjithçka arrihet. Për afro një vit aty është bërë një punë kolosale e transformuese. Volumin më të madh të punës e ka zënë, sigurisht, parkimi nëntokësor, mungesa e të cilit padyshim do i kish avancuar shumë më tej punimet. I projektuar me dy kate, duhet thënë se është bërë një punë e lavdërueshme për nga volumi që zë dhe cilësia e punimeve. Është shumë e gjetur ideja që për çdo vend parkim të ketë sensor të personalizuar që njoftojnë nëse vendi është i zënë apo bosh. Gjithashtu, është menduar që edhe sistemi i ndriçimit në vend parkime të jetë me sensor ndezje e fikje, kjo për të ekonomizuar sa më mirë energjinë elektrike.
Teksa ngjitesh sipër, aty ku duhet të kalojnë makinat dhe njerëzit, gjen një tjetër botë nga ajo që ishte diku përpara një viti. Dikur aty, e vetmja gjë “moderne” ka qenë një restorant dasmash në katin e dytë të ngrehinës së rrënuar të ish stacionit të trenit. Çdo gjë tjetër pastaj ka pas qenë një geto në kuptimin më klasik të fjalës. Geto e cila nuk është zhdukur plotësisht dhe, për “nostalgjikët” apo ata që ende nuk e kanë ditur se si ka pas qenë ajo zonë, është lënë një pjesë e cila padyshim që do transformohet në një fazë të dytë. Ajo geto, që çdokush do ketë mundësi ta shohë, ndodhet në pjesën e majtë të Bulevardit ose anën perëndimore të tij, ku ende gjendet disa shtëpi dhe sidomos tregu i rrobave të përdorura, një qelbësirllëk i pashoq kund tjetër për nga afërsia me qendrën e kryeqytetit.
Bulevardi i Ri është rritur në disa metra lartësi, jo vetëm për shkak të parkimit nëntokësor, por edhe për të arritur baras nivelin me pjesën tjetër, Unazën dhe Bulevardin “Zogu I-rë”. Tek pjesa e sheshit mbi parkim, për shkak të mungesës së shtresave me dhe, është improvizuar një lulishte mjaft interesante në lartësi 1.5 metër nga toka me pemë të vendosur në mënyrë të rregullt, rrethuar me vendpushim me elementë druri për qytetarët që duan të kalojnë disa orë aty. Gjithashtu, në mungesë të pemëve në atë pjesë mbi parkim, është menduar të vihen në funksion dhjetëra shatërvanë të sheshtë që do ndikojnë në një freskim të ambientit në ditë të nxehta.
Më tej, Bulevardi është konceptuar me dy korsi vajtje ardhje, me trafikndarës trotuar në mes, si dhe me një korsi të dedikuar për linjat e shërbimit urban apo mjetet e emergjencës. Pjesa në anësore është e gjelbëruar më mijëra lule ku veçohen ato të llojit “Livande e vërtetë” dhe “Rozmarinë”. Pemët e mbjella janë kryesisht të llojit pishë për të ruajtur uniformitetin me Bulevardin “Dëshmorët e Kombit”. Natyrisht nuk mund të mungojnë korsitë për të pasionuarit pas biçikletave, të cilat kryebashkiaku Veliaj i ka pikë të dobët. Sistemi i ndriçimit është perfeksion i vërtetë i cili thjesht duhet shijuar për kënaqësinë që te jep teksa shëtit përgjatë trotuarit të dedikuar për këmbësorët. Nuk duhet lënë pa vënë në dukje se ashtu si në Sheshin “Skënderbej”, edhe në Bulevardin e Ri, ujitja e pjesës së gjelbër nuk është lënë në dorë të natyrës apo Zotit, por me anë të tubacioneve të shtrira gjatë gjithë perimetrit të lulishteve, bëhet vetë spërkatja e automatizuar, gjë që garanton një gjelbërim gjithëvjetor, bie apo nuk bie shi.
Duket që aty çdo gjë është bërë me shumë dashuri, për t’i dhuruar kryeqytetit një tjetër vepër dinjitoze, madhështia e të cilës do kuptohet pasi i gjithë projekti të ketë përfunduar. Ky Bulevard është një tjetër xhevahir që i shtohet Tiranës dhe që shumë shpejt do të jetë zona më e frekuentuar dhe e dëshiruar. Kur para disa ditësh nxitova të shoh përpara inaugurimit sheshin “Skënderbej” për të dhënë disa përshtypje të para, e titullova shkrimin: “Të lumtë Erion Veliaj!” Edhe kësaj here sërish do t’i them të lumtë Lali Erit e nuk do resht t’ia përsëris sa herë ai, stafi i tij, projektuesit dhe zbatuesit, do i shtojnë Tiranës sonë vepra të mëdha e të bukura. Padyshim edhe kryeministrit Rama që po i jep një dorë të fortë këtij transformimi. Mezi pres që urimet e radhës t’ia jap për të tjera vepra madhore që së shpejti pritet t’u bëhet rikonstruksion i plotë: Kopshti Zoologjik & Botanik i Tiranës dhe Piramida. Erion Veliaj kurrë nuk zhgënjen!
