Avokati i biznesmenit Ergys Agasi, Maks Haxhia, deklaroi sot (28 gusht) pas përfundimit të seancës së masës së sigurisë ku u dha “arrest me burg” për klientin e tij, se SPAK nuk tregoi prova sa i takon akuzës së re që iu bashkëngjit klientit të tij, për korrupsion pasiv.
Haxhia iu përgjigj pyetjeve të gazetarëve, teksa shpjegoi se nuk kishte më akuzë për pengmarrje, e cila kishte rënë.
“Po kërkojmë që të na paraqesë prokuroria se ku qëndron prova për korrupsion. Këto janë masa që merr prokurori për të siguruar procesin e vetë, për të mos dështuar. Prokuroria nuk ka folur fare për këtë moment! E them me përgjegjësi të plotë. Pretendimi i Agasit është shkëputja e kontekstit, 2 apo 4, nuk ka të bëjë fare me atë që pretendon. Nuk është sjellë si moment prove”, tha ai mes të tjerash.
I pyetur se cila është marrëdhënia e Ergys Agasit me Mirlinda Karçanajn, ai tha:
“Duhet të pyesni atë!”.
Kurse pyetjes së ku ishte fshehur biznesmeni gjatë kësaj kohe, iu përgjigj shkurtimisht:
“Nuk është për mua as kjo pyetje!”.
Në lidhje me akuzat e ngritura ai shpjegoi veprat penale të SPAK, duke sqaruar se ajo e pengmarrjes kishte rënë.
“Problemi është që akuza e heqjes së paligjshme të lirisë në drejtim të zotit Agasi me analizat që iu bënë provave të administruara dhe vendimeve të prokurorisë, tregoi dhe çoi në çlirimin e kësaj akuze në ngarkim të zotit Agasi. Ajo që na bëri optimist është se organi i akuzës. Akuza për korrupsion pasiv, pasiguria e materialit të paraqitur deri tani e ka ndjekur akuzën për të qëndruar në pozitat e presionit ndaj gjykatës, sot u paraqit kjo akuzë. Klienti foli dhe dha shpjegime dhe insistoi e provoi se nuk ka qenë kurrë pjesëmarrës në tendera, nuk ka pasur asnjë përfitim dhe nëpërmjet tenderimin dhe nuk ka qenë pjesë e grupeve kriminale në presione të ndryshme”, u shpreh avokati Haxhia.
