Kërkesa e Presidentit të Turqisë Rexhep Tayyip Erdogan, për mbylljen e shkollave të rivalit të tij politik Fejtullah Gylen duke e cilësuar si lëvizje terroriste, bëri jehonë të madhe në politikën dhe shtypin shqiptar.
Por vetë Presidenti turk pas vizitës në Tiranë shprehet i bindur se ka gjetur mbështetjen e duhur nga qeveria shqiptare për mbylljen e shkollave.
Siç raporton Top-Channel, gjatë kthimit në Ankara, në avionin presidencial, Erdogan ka deklaruar para gazetarëve se Presidenti Bujar Nishani dhe Kryeministri Edi Rama kanë pasur një qasje pozitive, në lidhje me kërkesën e tij për insitutcionet arsimore të Gylen në Shqipëri.
Nga ana tjetër Tirana zyrtare e ka bërë të qartë se cila do të jetë përgjigja e Shqipërisë, pasi ditën e sotme Ministrja e Arsimit Lindita Nikolla theksoi se shkollat nuk do të mbyllen pasi ato plotësojnë kriteret dhe janë konform ligjit.
Në fakt pas prishjes së marrëdhënieve me Gylenin, Presidenti turk ka kërkuar me forcë nga çdo drejtues shteti dëbimin e aktiviteteve të kësaj lëvizjeje nga vendet e tyre.
Vetëm pak kohë më parë në mediat turke u publikua edhe një bisedë telefonike mes Presidentit amerikan Obama dhe Erdoganit, ku ky i fundit i kishte kërkuar ekstradimin e Fethullah Gulenit nga Amerika.
Presidenti turk, atëherë pretendoi se kishte marrë një përgjigje pozitive nga ana e Presidentit Obama, por disa ditë më pas zëdhënësi i Shtëpisë së Bardhë e përgënjeshtroi pjesën e bisedës, që kishte të bënte me esktradimin e Gulenit.