Pasi mposhti tentativën për grusht shteti, presidenti turk Rexhep Taip Erdogan do t’i përcjellë Parlamentit dy propozime, një për marrjen në kontroll të Agjencisë Kombëtare të Spiunazhit dhe tjetrën për drejtimin e stafit drejtues ushtarak.
Projektligjet pritet t’i dërgohen parlamentit ditët në vijim.
“Ne do të prezantojmë një paketë të ndryshimeve kushtetuese. Nëse do të miratohen Organizata Kombëtare e Inteligjencës (MTI) dhe stafi drejtues i ushtrisë do të kontrollohen nga presidenca”, ka deklaruar Erdogan për TV Haber. “Do të mbyllen shkollat ushtarake, do të ngrihet universiteti i mbrojtjes kombëtare”, tha ai.
Gjithashtu, do të ketë reduktim të numrit të ushtarëve në xhandarmëri, ndërsa do të rritet sasia e armatimeve.
Presidentit turk i duhet shumicë absolute për të miratuar ndryshimet kushtetuese dhe për këtë i duhet edhe mbështetja e partive opozitare. Edhe opozita, nga ana e saj, ka bërë përgjegjës Fetullah Gylen për tentativën e grushtit të shtetit.
Këto janë masat e fundit që ndërmerren në kuadër të dështimit të tentativës së grushtit të shtetit më 15 korrik 2016.
Ankaraja akuzon klerikun fetar Fetullah Gylen si organizatori i tentativës së “puçit ushtarak” i cili la të vdekur të paktën 246 të vdekur nga radhët e ushtarakëve, policisë si dhe civilëve.
Pavarësisht akuzave të Erdogan dhe autoriteteve turke, Gylen i cili jeton në ekzil në Shtetet e Bashkuara të Amerikës, mohon të ketë gisht në organizimin e grushtit të shtetit.
Shqiptarja/d.i.
