Ndërsa Donald Trump përpiqet të minimizojë skandalin e Jeffrey Epstein, një përçarje në rritje po shfaqet brenda bazës së tij politike. Presidenti i SHBA-së e ka quajtur interesin për Epstein një “humbje kohe”, por kjo qasje ka zemëruar shumë nga ndjekësit e tij konservatorë, përfshirë edhe zëra të fuqishëm të së djathtës si Tucker Carlson.
Gjatë një konference të organizuar nga “Turning Point USA” në Florida, Carlson kritikoi haptazi administratën Trump për shpërfilljen e pyetjeve legjitime mbi rastin Epstein, si dhe për lidhjet e elitës republikane me Izraelin dhe për fokusin tek tema të perceptuara si “çështje të kulturës”. Pa e sulmuar drejtpërdrejt Trumpin, ai denoncoi qasjen përçmuese ndaj kërkesave për transparencë.
“Tani po e bën të njëjtën gjë administrata Trump që e bënte më parë e majta – ‘hesht, nuk ia vlen të dëgjohesh’”, tha Carlson para një audience të re konservatore.
Në një intervistë të mëvonshme në podcast-in e Darryl Cooper, Carlson vazhdoi të ngrejë pikëpyetje mbi burimet e pasurisë dhe mbrojtjen politike të Epstein, duke nënkuptuar përfshirjen e njerëzve me pushtet. Ai tha se zhgënjimi personal nisi kur qeveria që kishte votuar refuzoi të trajtonte seriozisht pyetjet e tij dhe i quajti reagimet zyrtare për këtë çështje “të papranueshme”.
Çështja Epstein është kthyer sërish në fokus pas një sinjali nga Departamenti amerikan i Drejtësisë dhe FBI-ja se hetimi është konsideruar i mbyllur. Kjo ka acaruar bazën konservatore që prej kohësh beson se Epstein, i cili vdiq në rrethana të dyshimta në burg në vitin 2019, u vra për të mos zbuluar një listë klientësh me ndikim. Trump ka kontribuar në përhapjen e këtyre teorive, duke aluduar për përfshirjen e familjes Clinton.
Situata u përshkallëzua këtë javë pas një raportimi të Ëall Street Journal, ku thuhet se Trump kishte marrë pjesë në një libër urimesh për ditëlindjen e Epstein në vitin 2003, përmes një letre dhe një vizatimi nudo. Trump mohoi çdo lidhje dhe njoftoi se do të padisë gazetën për shpifje.
Megjithatë, për Carlson dhe një pjesë të elektoratit konservator, kjo nuk mjafton. Në fjalimin e tij në Florida, Carlson vuri theksin te problemet reale të amerikanëve, si vështirësia për të blerë një shtëpi apo rënia e lindshmërisë – duke thënë se kapitalizmi po dështon për brezat e rinj dhe se kjo po i shtyn drejt socializmit.
Carlson, i cili është përfolur si pasues i mundshëm i Trump-it në skenën politike, e ka mohuar ambicien për pushtet. Por në një podcast të fundit, ai vlerësoi zëvendëspresidentin aktual JD Vance si shpresën më të mirë për të trashëguar dhe zgjeruar vizionin e Trumpit.
“Është i vetmi në Partinë Republikane që mund ta bëjë atë që Trumpi duhej të kishte bërë me të vërtetë”, tha ai.
Përçarja që po shfaqet tani rreth çështjes Epstein mund të sinjalizojë sfida të reja për Trumpin në rrugën drejt një kandidature të dytë presidenciale – jo nga e majta, por nga vetë zemra e lëvizjes MAGA.
