Jeffrey Epstein ka bërë pagesa prej 75 mijë dollarësh në llogari të lidhura me ambasadorin britanik Lord Peter Mandelson, sipas deklaratave bankare të publikuara nga Departamenti i Drejtësisë së SHBA-ve.
Midis viteve 2003 dhe 2004, Epstein duket se ka dërguar tre pagesa të ndara nga 25 mijë dollarë, duke përmendur Lord Mandelson.
BBC shkruan se këto pagesa janë pjesë e miliona dokumenteve të publikuara të premten, të lidhura me Epstein-in, i cili ishte një i dënuar për krime seksuale, dhe kjo është seria më e madhe e dokumenteve të ndara nga qeveria amerikane deri më tani.
Lord Mandelson tha se nuk kishte asnjë regjistër dhe nuk mbante mend t’i kishte marrë këto shuma parash nga Epstein dhe nuk dinte nëse dokumentet ishin autentike. Ai u kërkoi falje “pa rezervë grave dhe vajzave që vuajtën” nga Epstein dhe shprehu keqardhje që e kishte vazhduar miqësinë me të edhe pas dënimit të tij.
Në këtë seri dokumentesh janë zbuluar edhe fotografi të ish-ambasadorit britanik në SHBA të veshur vetëm me të brendshme. Në një fotografi të redaktuar, ai shihet pranë një gruaje, fytyra e së cilës nuk duket. Mandelson ka thënë se nuk e mban mend as vendndodhjen, as identitetin e gruas dhe nuk mund “të kujtojë rrethanat” e asaj fotoje. Nuk dihet se kur apo ku janë marrë këto imazhe.
Deklaratat bankare të publikuara së fundmi, të raportuara për herë të parë nga Financial Times, tregojnë tre pagesa të ndara që përmendin Lord Mandelson, i cili në atë kohë ishte deputet i Partisë Laburiste për Hartlepool, dhe dërgohen nga llogaritë bankare të Epstein-it në JP Morgan.
Pagesa e parë, e datës 14 maj 2003, tregon një transferim në një llogari Barclays ku Reinaldo Avila da Silva (partneri i Mandelson-it në atë kohë) figuron si “A/C”, zakonisht shkurtesë për llogarinë. Në atë pagesë, “Peter Mandelson” figuron si “BEN”, zakonisht shkurtesë për përfituesin.
Pagesat e dyta dhe të treta, nga 25 mijë dollarë secila, janë bërë në llogaritë HSBC vetëm disa ditë më vonë në qershor 2004, ku përsëri “Peter Mandelson” është i vetmi i përmendur si “BEN”. Nuk dihet nëse këto pagesa kanë arritur realisht në llogaritë e emëruara.
Da Silva, i cili u martua me Lord Mandelson në vitin 2023, përmendet edhe në pjesë të tjera të dokumenteve të Epstein. Email-et e vitit 2009 tregojnë se Epstein i kishte dërguar 10 mijë paund për një kurs osteopatie.
Lord Mandelson ka thënë se ka qenë “shumë i qartë” për marrëdhënien e tij me Epstein gjatë intervistave për BBC-në dhe nuk ka pasur asgjë më për të shtuar.
Sjellim ndërmend se Mandelson ishte i dërguar si ambasador i Mbretërisë së Bashkuar në SHBA në vitin 2024, por u shkarkua një vit më vonë pas zbulimeve të reja mbi miqësinë e tij me Epstein. Dokumentet tregojnë gjithashtu se ai mbajti kontakte me Epstein edhe pas dënimit të tij në 2008 dhe i dërgonte mesazhe mbështetëse.
Epstein u dënua në vitin 2008 për shfrytëzim të vajzave të mitura për prostitucion dhe vdiq në vitin 2019 ndërsa priste gjyqin për trafik seksual.
