Enver Petrovci ka qenë sërish në Beograd. Ka kaluar vetëm tri ditë në qytetin i cili dikur ka qenë vendqëndrimi i tij i përhershëm. Aktori i njohur shqiptar ka marrë një ofertë jo fort të zakonshme nga shoku dhe kolegu i tij i Fakultetit të Arteve Dramatike në Beograd, Radosha Bajiçi – të luajë fshatarin serb, Grujicën. Kush do të mund t’i rezistonte kësaj…, citon “Blici” i Beogradit Petrovcin, ndërsa e transmeton “Koha Ditore”.
“Kur më ftoi Radoshi dhe ma ofroi rolin në filmin ‘Braća po babine linije’ (Vëllezër nga ana e gjyshes) e pranova me kënaqësi të madhe, veçmas kur e kam lexuar skenarin. Bile i kam thënë se dialogët i ka fantastikë, të natyrshëm dhe thjesht dalin prej njeriut. Dialogët e tij nuk i mundojnë aktorët, sepse ai e njeh mirë njeriun, reagimin e tij dhe shkruan kësisoj. I kam thënë se më vjen keq që nuk shkruan drama, por skenarë. Më duket se do të m’i marrë parasysh këto. Ka premtuar se do të shkruajë drama edhe pse në atë punë s’ka para, sepse s’mund të fitohet shpejt”, ka thënë Petrovci.
