Situata energjetike në vend gjatë vitit 2018 shënoi një bilanc pozitiv, ku veçohet rritja e prodhimit të energjisë me 89%, ndërsa eksportet janë 5.5 herë më të larta se viti paraardhës.
Në statistikat e publikuara nga INSTAT, nënvizohet se gjatë vitit 2018, energjia elektrike në dispozicion u rrit me 2,7 %.
“Prodhimi neto vendas i energjisë elektrike në këtë periudhë arriti vlerën 8.552 GWh nga 4.525 GWh energji të prodhuar në vitin 2017, duke shënuar një rritje të prodhimit prej 89,0 %”, theksohet në raport.
Në totalin e energjisë elektrike të prodhuar, hidrocentralet publike kontribuan në masën 68,4 %, ndërsa hidrocentralet private dhe koncensionare realizuan 31,6 % të prodhimit neto vendas të energjisë elektrike.
Rritja e prodhimit të energjisë elektrike në vitin 2018, ka ndikuar në uljen e importeve bruto të energjisë elektrike me rreth 1,9 herë dhe rritjen e eksporteve bruto të energjisë elektrike me rreth 5,5 herë, krahasuar me të njëjtën periudhë të një viti më parë.
Në vitin 2018, hidrocentralet publike prodhuan 5.851 GWh energji elektrike nga 2.917 GWh të prodhuar në vitin 2017, duke shënuan kështu një rritje të prodhimit me rreth 2 herë.
Ndërsa, hidrocentralet private dhe koncensionare, prodhuan 2.701 GWh energji elektrike nga 1.608 GWh të prodhuar në të njëjtën periudhë të një viti më parë, duke shënuan një rritje të prodhimit të energjisë elektrike me rreth 1,7 herë.
Gjatë vitit 2018, humbjet në rrjet arritën vlerën 1.783 GWh nga 1.876 GWh që ishin në vitin 2017, duke shënuar kështu një rënie me 5,0 %.
Ndikim në këtë rënie ka patur ulja e humbjeve në shpërndarje e cila përbën 86,4 % të humbjeve gjithsej në rrjet. Humbjet në shpërndarje janë ulur me 10,3 %, ku impaktin më të madh e dhanë humbjet teknike në shpërndarje të cilat u ulën me 14,2 %, krahasuar me të njëjtën periudhë të një viti më parë.
Sipas INSTAT, përdorimi i energjisë elektrike nga konsumatorët në vitin 2018 u rrit me 5.0 % duke arritur vlerën 5.841 GWh nga 5.563 GWh që ishte në vitin 2017. Ndikimin më të madh në rritjen e përdorimit të energjisë elektrike nga konsumatorët e kanë dhënë konsumatorët jo familjarë të cilët kontribuan me 4,5%, përkundrejt kontributit prej 0,5 % të energjisë së konsumuar nga konsumatorët familjarë.
/a.rada
