Niveli i humbjeve në rrjetin e energjisë elektrike ka zbritur në 24% nga 26% që ishte dhe arkëtimet nga 87% sot janë në 92%.
Zëvendësministri i Energjisë dhe Infrastrukturës, Ilir Bejtja ishte sot i ftuar në Komisionin për Veprimtaritë Prodhuese, Tregtinë dhe Mjedisin ku u miratua në parim, nen për nen dhe në tërësi projektligji “Për ratifikimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës Federale të Gjermanisë, për bashkëpunim financiar 2016 për projektin “Programi i investimeve për shpërndarjen e energjisë elektrike I””.
Gjatë prezantimit të projektligjit, zëvendësministri Bejtja u shpreh se, marrëveshja është në kuadrin e bashkëpunimit ndërqeveritar me qeverinë gjermane dhe si protokoll është firmosur në vitin 2016.
“Targetet sipas planit të rikuperimit financiar që ne kemi pasur kanë qenë të lidhura me nivelin e humbjeve, pra duhej të zbrisnin nga 26% dhe ne sot jemi 24%, dhe arkëtimet ishin më shumë se 87% dhe ne sot i kemi 92%. Pra bëhet fjalë për arkëtimet koherente. Në këtë kuadër, çdo investim do të jetë i lidhur me targete për t’u përmbushur dhe do të shkojë në mënyrë eksplicite në projekte të cilat vlerësojnë akoma përsëri grafikun e uljes së humbjeve dhe të rritje së arkëtimeve në zona.”- theksoi ndër të tjera Bejtja.
Relatorja e projektligjit deputetja Eglantina Gjermeni tha se, ky projektligj synon ratifikimin e marrëveshjes së bashkëpunimit financiar 2016 për projektin “Programi i investimeve për shpërndarjen e energjisë elektrike I”, nëpërmjet të cilës qeveria e Republikës Federale të Gjermanisë i jep mundësi Këshillit të Ministrave të Republikës së Shqipërisë, të marrë një kredi të butë dhe një shumë financimi nga KFV-ja për projektin “Programi i investimeve për shpërndarjen e energjisë elektrike I”.
Të ftuar për këtë projektligj ishin edhe Agim Bregasi drejtor dhe Ilda Malile drejtoreshë në OSHEE.
Projektligji kaloi në diskutime dhe komente nga anëtarët e komisionit, ku më pas u miratua në parim, nen për nen dhe në tërësi.
/g.kosovari
