Policia është ende në kërkim të 45 vjeçarit Gëzim Saraçi, autori i dyshuar i ngjarjes që ndodhi mëngjesin e 31 dhjetorit, kur ai i hodhi në zyrë një granatë dore ndaj kryebashkiakut të Lushnjës, Fatos Tushe.
U vendos edhe një shpërblim i majmë, për kapjen e tij, por ende nuk ka asnjë rezultat.
Ka pasur një fluks të lartë telefonatash që kanë dhënë informacion, por 45 vjeçari ende nuk po bie në prangat e policisë.
Dyshimet janë se pas ngjarjes, Gëzim Saraçi është ndihmuar nga persona të tjerë që të vazhdojë rrugën nga Lushnja drejt Beratit dhe aty ku humbur “gjurmët”.
Për shkak të njohjes dhe miqësisë që ai ka patur me kryebashkiakun Gëzim Saraçi nuk është ndaluar nga rojet.
Nga hetimet dyshohet se konflikti ka lindur në vitin 2017 kur kryebashkiaku e largoi nga puna ish shoferin e tij pasi thuhet se kishte marrë sinjalizime për shfrytëzim të pozitës së tij nga ana e shoferit përballë bizneseve.
Megjithatë ish shoferi vijonte të ishte në borderotë e bashkisë së Lushnjes. Sipas dëshmive thuhet se ish- shoferi vazhdimisht përplasej me kryebashkiakun duke e shantazhuar me ekzistencën e disa videove, ku edhe e kërcënonte se do t’i bënte publike.
Por nga rrjedhja e ngjarjeve tregon se Tushe ka refuzuar që të bëhet viktimë e shantazhit duke sjellë edhe reagimin ekstrem të ish shoferit të tij. Ndërkohë policia ka marrë të gjitha provat, përfshi edhe pamjet e kamerave të sigurisë në bashkinë e Lushnjes si dhe ka marrë në pyetje punonjësit.
Ndërkohë që po shikohet edhe dosja penale e personit në kërkim. Ai mendohet se ka një të kaluar problematike gjatë kohës kur ka jetuar në Itali. Sipas Partisë Demokratike autori i ngjarjes është një trafikant droge dhe prostitucioni, i cili ka financuar fushatën elektorale të Fatos Tushes.
Për kapjen e tij, policia ka ofruar 10 milion lekë për çdo informacion që do ta çojë në gjurmët e autorit që qëlloi ndaj kryebashkiakut.
Forcat speciale Renea, FNSH-ja e Fierit, shërbimet e Komisariatit të Policisë Lushnjë dhe të DVP Fier vijojnë krehjen e zonës, për kapjen e autorit të kësaj ngjarjeje.
Autori ka mundur të largohet menjëherë pas ngjarjes dhe dyshohet se është fshehur në territorin e qarkut Berat dhe dyshohet se fshihet ende në këtë zonë.
Me qëllim kapjen sa më shpejt të tij, Policia e Shtetit kërkon bashkëpunimin e qytetarëve dhe vë në dispozicion 1 milionë lekë të rinj për çdo informacion të saktë që do çojë në lokalizimin dhe kapjen e autorit.
“Për çdo informacion sado të vlefshëm, qytetarët të telefonojnë në numrin unik 112 apo të dërgojnë imazhe në Komisariatin Dixhital, si dhe në numrin e celularit 069 41 07 337, duke ju garantuar anonimat të plotë dhe reagim të menjëhershëm të strukturave të Policisë për të kapur dhe vënë para përgjegjësisë ligjore autorin e kësaj ngjarjeje”, thuhet në njoftimin e Policisë së Shtetit. /e.s/
