38 vatra zjarri janë regjistruar në 24 orët e fundit në të gjithë vendin, nga të cilat 31 janë shuar, ndërsa 7 të tjera janë ende aktive.
Ato janë të shpërndara në qarqe si Vlora, Lezha, Dibra, Berati dhe Shkodra.
Më problematike paraqitet situata në Bashkinë Finiq, ku zjarret kanë rrethuar disa fshatra. Bëhet fjalë për fshatra si Velahovë, Livinë, Ardhasovë, Bistricë, Krongj, Dhrovjan dhe Krane, ku zjarret kanë vijuar edhe gjatë natës, duke përfshirë edhe zonat e banuara.
Për shkak të rrezikut të lartë, autoritetet evakuan banorë në Livinë, Krongj dhe Ardhasovë, ndërkohë që për të moshuarit u vendosën ekipe të gatshme që ofrojnë asistencë mjekësore.
Pavarësisht angazhimit të zjarrfikësve të disa bashkive dhe mbi 70 forcave të ushtrisë dhe policisë, zjarret dogjën një shtëpi dhe një kishë, si dhe sipërfaqe të mëdha me ullinj dhe pemëtari të tjera.
Në orët e para të mëngjesit, një operacion shpëtimi pati për qëllim ndalimin e avancimit të zjarrit drejt Hidrocentralit të Bistricës, i cili gjithashtu rrezikoi të digjej.
Në këtë bashki, situata paraqitet problematike edhe për shkak të terrenit të thyer, çka ka detyruar emergjencat civile të ndërhyjnë nga ajri për shuarjen e flakëve.
Për arsye sigurie, më herët është kufizuar qarkullimi i automjeteve në aksin Muzinë – Bistricë, për të cilin ministri i Mbrojtjes, Pirro Vengu, tha se do të jetë i mbyllur deri në përfundim të operacionit të shuarjes së flakëve.
Një zjarr tjetër ra këtë mesditë në afërsi të qytetit të Gjirokastrës, i cili rrezikoi stacionin e pompave të ujit që furnizojnë qytetin.
Por ndërhyrja e zjarrfikësve bëri që situata të vihej shpejt nën kontroll.
