Lavdrim Tufa ka përfunduar në prangat e policisë së Tiranës për gjobëvënie.
37-vjeçari, i cili nuk është emër i panjohur për drejtësinë, pasi ka qenë i dënuar me 20 vjet burg për vrasjen e Fatmir Ramës (Miri i Xhikes), sipas policisë i ka kërkuar me anë të kërcënimit 90 mijë euro administratorit të një firme private.
“Ky shtetas, i ka kërkuar shumën prej 90 000 euro duke e kanosur administratorit të një firme private, me pretendimin se ky i fundit kishte detyrime ndaj shtetasit italian P. E., 50 vjeç”, sqaron policia në një njoftim për mediat.
Për rastin u procedua në gjendje të lirë për moskallëzim të krimit edhe një 37-vjeçar me iniciale F. Sh., banues në Tiranë, i cili ka patur dijeni për rastin dhe nuk ka kallëzuar pranë policisë. Gjithashtu në kërkim u shpallën edhe dy persona të tjerë P. E., 50 vjeç, banues në Itali dhe A. G., 49 vjeç, banues në Durrës, sqaron policia
Gjatë kontrollit të ushtruar në shtëpinë e Lavdrim Tufës, policia gjeti dhe sekuestroi një antiplumb.
Biznesmeni Fatmir Rama, i njohur ndryshe si Miri i Xhikes u vra në zonën Lundrës në Mars të 2003. Për vrasjen e tij, gjykata dënoi me 20 vjet burg 37-vjeçarin Lavdrim Tufa. Por kur i kishin mbetur ende 1 vit e 8 muaj e 10 ditë burg për të vuajtur, Tufa u la në liri me kusht, në Prill të 2015-ës.
a.ç
