Në rajonin italian të Trentino-Alto Adige më 22 tetorin e ardhshëm do të zhvillohen zgjedhjet rajonale.
E ndërsa fushata elektorale në rajonin e pasur italian ka nisur fuqishëm, mes kandidatëve është edhe një shqiptar.
Bëhet fjalë për Fation Mullicin që kandidon për Këshilltar province (Consigliere provinciale) në Rovereto Trentino-Alto Adige.
Mullici aderon në partinë rajonale “La Civica”, një lëvizje kjo me rrënjë të forta në komunitetin lokal dhe përfaqëson zemrën e Trentinos, ku prodhohen politikat për rajonin.
Por kjo nuk është hera e parë që Mullici kandidon. Para tre vitesh ai u zgjodh si këshilltar komunal i Roveretos.
Fitorja e tij tërhoqi vëmendjen e medias italiane për shkak të historisë së veçantë të Mullicit.
Fationi, tani 42 vjeç, shkoi në Itali si klandestin me gomone dhe tani është sipërmarrës në ndërtim dhe impiantet elektrike.
Ai nuk është vetëm i preferuari i shqiptarëve në këtë rajon, por edhe italianëve dhe këtë arsye në zgjedhjet e kaluara, Mullici ishte edhe kandidati që mori më shumë preferenca personale.
Ai thotë se do të bëjë një punë të mirë dhe do të jetë zëdhënës i të gjitha komuniteteve që jetojnë në rajonin e Trentino-Alto Adige dhe se dëshiron që të gjithë të emigrantët të integrohen realisht pa paragjykime.
Në një intervistë për mediat italiane, Mullici thotë: “Unë besoj që përtej rreshtimeve politike, të gjithë duhet të punojmë rreth këtij rajoni të bukur. Rovereto është një qytet që më ka mikpritur dhe më ka ndihmuar të punoj. Dhe për këtë dua t’ia shpërblej duke iu dedikuar të gjithë rajonit”.
Mullici shkoi në Itali në vitin 1997: “Isha 15 vjeç dhe erdha i vetëm, klandestin me një nga gomonet që kalonin detin Adriatik. Zbarkova në Bari ku ishte xhaxhai im që më priste dhe punova një vit e gjysmë në mes të kampeve. Më pas, nëpërmjet miqve arrita në Rovereto ku gjeta punë dhe nisa studimet”. Në 2008 ai hapi një kompani për impiantet elektrike dhe në 2010 një kompani ndërtimi.
Pra, Fation Mullici është përfaqësuesi tipik i emigrantit shqiptar që nga asgjëja, me anë të punës është kthyer në një simbol suksesi dhe krenarie për komunitetin shqiptar në Itali. Tashmë këta të fundit duhet të bashkohen rreth Mullicit për ta votuar duke pasur kështu një përfaqësues të tyrin dinjitoz në rajonin e Trentino-Alto Adige./m.j
