Atentati i mbrëmjes së djeshme në një lokal në zonën e Don Boskos në Tiranë, ka tronditur mbarë vendin.
Viktimë e atentatit ka mbetur banakjerja 60-vjeçare Mimoza Paja, ndërsa nga të shtënat mbetën të plagosur Sahit Murati 50 vjeç, Astrit Meraj 42 vjeç, Emanuel Sala 47 vjeç, Ermir Bejuku 45 vjeç dhe Genc Shohalli 55 vjeç, si dhe u dëmtua e mitura 10-vjeçare.
Disa orë pas atentatit, gjendja e të plagosurve fatmirësisht paraqitet jashtë rrezikut për jetën.
Gazetarja e Klan News, Glidona Daci raporton se e mitura 10-vjeçare e cila është dëmtuar si pasojë e xhamve të thyer nga sulmi me armë, paraqitet në gjendje të mirë shëndetësore.
“Midis tyre është edhe një e mitur 10-vjeçare, e cila është plagosur, sipas informacioneve nga spitali, ajo ka mbetur e dëmtuar si pasojë e xhamave të thyer. Fatmirësisht të gjithë të plagosurit janë jashtë rrezikut për jetën.”
Sipas informacioneve paraprake, disa prej të plagosurve kanë përshkruar mekanizimin e ngjarjes, por mohojnë që të kenë dijeni mbi autorët e atentatit.
Në lidhje direkte për Klan News, gazetari Besar Bajraktaraj ka dhënë më shumë detaje për dinamikën e krimit, teksa raporton se referuar hetimeve, autorët dyshohet të kenë qëlluar nga ambientet jashtë lokalit.
“Ndodhem në vendin e ngjarjes. Lëndime mori edhe një vajzë 10-vjeçare. Vendi i krimit vijon të jetë i rrethuar me perimetrin e sigurisë. Policia është duke mbledhur provat materiale. Grupi hetimor ende nuk e ka përfunduar punën në ambientin e lokalit. Janë duke u kryer veprime hetimore edhe gjatë ditës së sotme. Nga ana e grupit hetimor është ndërtuar edhe një dinamikë paraprake rreth rrethaneve të ngjarjes. Autorët dyshohet se kanë ardhur nga ky vend që po raportojmë. Në vendin e ngjarjes, autorët janë larguar përmes rrugicave, dyshohet se destinacioni tjetër të ketë qenë Durrësi. Në vendin e ngjarjes, janë konstatuar edhe motorë për të cilat u dyshua në fillim se ishin përdorur nga autorët, por verifikimet rezultuan se ishte makinë mjeti që përdorën autorët.”
Mëngjesin e sotëm, një makinë tip BMW është gjetur e djegur në zonën e Bubqit. Ky mjet dyshohet të jetë përdorur në atentatin e “Don Boskos” mbrëmjen e së dielës. Brenda mjetit të djegur dyshohet të jenët konstatuar edhe 2 armë zjarri kallashnikov.
/a.r
