Situata në degën e Partisë Demokratike në Durrës sa vjen dhe rëndohet.
Ditën e djeshme, rreth mesditës, sekretari Organizativ i PD, Enno Bozdo, ka shkuar në zyrat e degës në Durrës dhe ka dhunuar ambientet e saj.
Burime nga dega e PD Durrës thanë pëe citynews se Enno Bozdo ishte i shoqëruar nga anëtari i kryesisë Pëllumb Berisha, nga sekretarja e degës, Dejana Burgija e cila njihet si ish-mbështetësja e Edi Ramës në fushatën e vitit 2007 dhe nga bashkëshorti i saj, Tan Burgija.
Të njëjtat burime theksuan se me një akt skandaloz, Enno Bozdo së bashku me çiftin Burgija dhe pa praninë e anëtarëve të kryesisë së PD-së në Durrës kanë thyer dyert e degës dhe kanë hyrë në zyrat e saj, përfshirë edhe zyrën e kreut Osman Stafa.
Mësohet se pas hyrjes me dhunë në selinë e PD në Durrës, personat e sipërpërmendur kanë ndryshuar çelësat dhe bravat e dyerve të zyrave.
Dega e Partisë Demokratike në Durrës ka kundërshtuar fort vendimin e kryetarit demokrat, Lulzim Basha, për zhvillimin e zgjedhjeve dhe mbi të gjitha ndarjen e degës.
Kjo mesa duket ka qenë edhe arsyeja e kësaj “grabitjeje” të zyrave të PD në Durrës nga Enno Bozdo dhe çifti Burgija.
Tema/d.i.
