Ministri i Brendshëm Saimir Tahiri dhe Komisioneri për Emigrancionin në Bashkimin Evropian Dmitris Avramopolous zhvilluan një konferencë të përbashkët për shtyp pas takimeve që zyrtari i lartë i BE zhvilloi në Tiranë me krerët e shtetit. Në fokus të takimeve ishte kriza e emigrantëve që mund të prekë edhe vendin tonë. Tahiri tha gjatë konferencës se vendi ynë do të japë kontributin e tij krah aleatëve, por nuk mund të përballojë i vetëm flukse migratore, ndaj bëri thirrje për një strategji evropiane.
“Vendi ynë është i gatshëm të mbajë përgjegjësitë e veta, në kuadër të planit evropian. Të gjithë bashkë nën flamurin evropian, të përballemi me një emergjencë humanitare dhe solidariteti. Ndamë bindjen që duhet më shumë koordinim mes nesh. I shpreha shqetësimin Komisionerit me domosdoshmërinë për një plan të përbashkët për të mos u përballur me skenarët e së shkuarës. Çdo veprim të jetë i koordinuar dhe të jemi gati për flukset e mundshme. Kjo është një çështje evropiane që Shqipëria nuk mund të jetë vetëm. Shqipëria do jetë tërësisht e angazhuar për të mbajtur përgjegjësitë e saj krah aleatëve dhe vendeve të rajonit”, tha Tahiri.
Ndërkohë Avramopolous deklaroi se ende nuk ka indicie për përfshirjen e Shqipërisë nga vala e refugjatëve, por tha se duhen marrë masat për çdo situatë të mundshme. Ai tha se vendi ynë nuk do të jetë i vetëm në rast të një krize të mundshme.
“Evropa përballet me një situatë të paprecedentë dhe Evropa nuk ishte përgatitur për tu përballur me një situatë kaq komplekse dhe të vështirë. Ende nuk e dimë në fakt se cilat do jenë pasojat në rajonin më të gjerë, në rajonin e fqinjësisë së mirë. Shqipëria nuk gjendet e vetme në këtë çështje, natyrisht në rast se do përballet. Deri tani nuk ka indicie që Shqiëpria të jetë ndikuar nga flukse të mëdha, por ama po monitorojmë situatën në çdo kohë në mënyrë konstante”, tha Avramopolous.
