Mediat holandeze bëjnë të ditur se klandestinët shqiptarë kanë gjetur një metodë të re për të kaluar ilegalisht në Angli. Policia ushtarake holandeze ndaloi ditën e shtunë një grup prej 25 vetash që ishin nisur ilegalisht me një jaht nga porti Ljmuiden në Holandë. Sipas policisë nga të arrestuarit të paktën 11 persona kishin shtetësinë shqiptare, ndërsa identiteti i personave të tjerë nuk është verifikuar ende.
Mediat shkruajnë se jahti sipas të gjitha gjasave kishte si destinacion final Anglinë. Në deklaratën e policisë holandeze thuhet se janë arrestuar dhe dy shtetas vendas, njëri 25 dhe tjetri 26 vjeç, të cilët u gjendën bashkë më personat e tjerë në bord. Të dy shtetasit holandezë do të procedohen për trafikim të qenieve njerëzore.
Ndërkohë, kjo nuk është hera e parë që klandestinët shqiptarë përfshihen në një tentativë për të kaluar ilegalisht kufirin midis Holandës dhe Anglisë. Sipas Janet Takens, një zëdhënëse i ministrisë holandeze për Siguri dhe Drejtësi, është shqetësues që numri i klandestinëve shqiptarë është gjithmonë në rritje. Ajo thekson se në dy vitet të fundit, shqiptarët përbëjnë më shumë së 50% të numrit total të klandestinëve të kapur në Holandë./ABC News/
