Në pikën Kufitare të Kakavijës, një nga pikat kryesore të kalimit mes Shqipërisë dhe Greqisë. vijojnë lëvizjet për festat e fundvitit, ndërsa strukturat përgjegjëse janë në funksion për garantimin e mbarëvajtjes së shërbimit.
Autoritetet kufitare po kryejnë kontrollet sipas rregullave në fuqi, ndërsa udhëtarët janë të orientuar për të respektuar dokumentacionin e nevojshëm dhe procedurat përkatëse gjatë kalimit në kufi.
Në këtë periudhë festash të fundvitit në Stacionin Kufitar të Kakavijës vazhdon të regjistrohet fluks lëvizje në të dyja anët e kufirit me Greqinë.
Sipas Policisë Kufitare në Gjirokastër, përgjatë 24-orëve të fundit nëpërmjet kësaj dogane udhëtuan në drejtim të shtetit grek dhe anasjelltas 9.362 shtetas dhe 3.058 automjete.
Fluksi më i madh është regjistruar në hyrje të tokës shqiptare ndërsa bashkatdhetarët tanë kthehen për të festuar në vendlindje.
Aktualisht Policia Kufitare në Kakavije ka marrë masat për evitimin e radhëve të pritjes në sportelet e dokumenteve.
Gjithashtu është rritur prania e efektivave blu për garantimin e sigurisë publike në mjediset e kësaj dogane dhe goditjen e ngjarjeve kriminale në vijën kufitare me shtetin grek.
Shtim i pranisë së Policisë Rrugore konstatohet edhe në rrugën kombëtare Gjirokastër-Kakavije me synim parandalimin e aksidenteve rrugore.
