Parlamenti hungarez mbështeti bindshëm projektligjin për të detyruar ndalimin e të gjithë azilkërkuesve në kampet që do të ngrihen në kufijtë jugorë të vendit, ndërsa kryeministri Viktor Orban e quajti emigracionin si ‘kal troje’ për terrorizmin.
“Kriza e emigracionit do të zgjasë derisa të luftohen të gjitha shkaqet e saj dhe derisa të pranohet kudo se emigracioni është kali i trojes së terrorizmit. Ligjet janë të detyrueshme për të gjithë, e nuk kanë pse të bëjnë përjashtim emigrantët që përpiqen të hyjnë ilegalisht në vend”, tha Orban.
Ky hap ka alarmuar Organizatën e Kombeve të Bashkuara, që e sheh atë si shkelje të ligjeve ndërkombëtare. Sipas zëdhënëses së UNHCR-së, Cecile Pouilly, masa që parashikon edhe ashpërsimin e kontrollit në kufijtë hungareze, do të ketë ndikime të tmerrshme fizike dhe psikologjike tek azilkërkuesit.
“Praktikisht kjo nënkupton se çdo azilkërkues do të mbahet i mbyllur në kontenierë të rrethuar me tela me gjemba për një periudhë të gjatë kohe. Ligji shkel detyrimet ndërkombëtare të Hungarisë”, thotë ajo,raporton tch.
Kufiri jugor me Serbinë shënon edhe vijën e jashtme kufitare të zonës Shengen të Bashkimit Europian dhe qindra-mijëra vetë e kanë kaluar atë. Azilantëve që nuk do t’u aprovohen menjëherë kërkesat, nuk do të lejohen të lëvizin lirshëm në Hungari, por do të mbahen të mbyllur në kampe, e do të mund të largohen vetëm në drejtim të Serbisë.
