Ministria për Europën dhe Punët e Jashtme me anë të një video të publikuar sot ka bërë të rezultatet e arritura deri më tani në kuadër të fushatës për korrigjimin e emërtimeve gjeografike të relievit shqiptar, të cilat bien ndesh me hartën e Republikës së Shqipërisë.
MEPJ, thekson se në bashkëpunim me ASIG dhe përfaqësitë diplomatike shqiptare, është arritur korrigjimi i mbi 41 pasaktësive të publikuara në platforma të ndryshme online.
Ndërkohë së fundmi, në maj të këtij viti u korrigjua edhe emërtimi i lumit Vjosa në platformën ‘Microsoft Bing’, i cili në rrjedhën e tij brenda territorit shqiptar në këtë platformë njihej nën emërtimin Aoos.
“Në korrik të vitit 2020, Ministria për Europën dhe Punët e Jashtme nisi një fushatë për korrigjimin e emërtimeve gjeografike të relievit shqiptar, të cilat bien ndesh me hartën e Republikës së Shqipërisë”, thuhet në video.
“Pas evidentimit të 41 pasaktësive të publikuara në platformat “Google Maps” dhe “Google Earth”, MEPJ në bashkëpunim me Autoritetin Shtetëror për Informacionin Gjeohapësinor (ASIG) iu drejtua kompanisë Google me një kërkesë për riemërtimin e tyre. Pasaktësitë u korrigjuan brenda tetorit të vitit 2020”, theksohet në video.
“Një kërkesë e ngjashme iu dërgua edhe platformës “Microsoft Bing” për rregullimin e emërtimit të lumit Vjosa, i cili në rrjedhën e tij brenda territorit shqiptar në këtë platformë njihet në emrin Aoos. Ky emërtim u korrigjua në maj të vitit 2021”, theksohet më tej në video.
“Gjatë 2020 nëpërmjet një deklarate të përbashkët, Ministritë e Jashtme të Shqipërisë dhe Kosovës i kërkuan drejtorit ekzekutiv të kompanisë Apple z. Tim Cook, marrjen e masave të nevojshme për të paraqitur kufijtë e saktë të Republikës së Kosovës në shërbimin e Apple Maps. Kosova u vendos në hartën e Apple gjatë muajit gusht të vitit 2020”, theksohet në video.
Fushata e ndërmarrë nga Ministria për Europën dhe Punët e Jashtme synon rregullimin e çdo pasaktësie të kësaj natyre, duke i shërbyer aksesit sa më të plotë dhe të saktë të emërtesave gjeografike nga qytetarët shqiptarë brenda dhe jashtë vendit, si dhe të huajt që vizitojnë vendin tonë.
/a.r
