Ky organ jo vetëm që nuk ka më kompetenca, por është shkrirë. Të gjitha kompetencat i kalojnë organit të ri, Këshillit të Lartë Gjyqësor, i cili pritet të ngrihet. Këtë logjikë e përforcon më tepër edhe ish-kreu i Gjykatës Kushtetuese, Fehmi Abdiu, për “Sot”. Fehmi Abdiu sqaron se KLD është shkrirë si pasojë e reformës në drejtësi dhe ky organ tashmë i vjetër nuk mund të bëjë emërime gjyqtarësh.
Më tej, ai sqaron se as gara për vendet vakante për gjyqtarë nuk mund të hapet kur ende nuk është ngritur organi i ri, KLGJ. “E para, pa u krijuar organi i ri nuk mund të hapet gara për vendet vakante të gjyqtarëve. E dyta, me hyrjen në fuqi të ligjit të ri organi i vjetër nuk ekziston”, sqaron Abdiu.
Ai thotë se kjo situatë kaotike e krijuar dhe nga vonesa e zbatimit të reformës në drejtësi, mund të ketë nevojë për një zgjidhje të re ligjore. “Kësaj situate sërish duhet t’i japë zgjidhje ligji. Kjo është një situatë delikate dhe shumë e vështirë. Duhet të ballafaqohen të dyja ligjet, dhe ndoshta duhet të mendohet për një zgjidhje të re ligjore, se ligjvënësit nuk mund t’i ketë shkuar mendja që të krijohet një situatë si kjo, për shkak të vonesave që sjell”, u shpreh Abdiu.
Me nisjen e ngritjes së organeve të vetingut, KLGJ dhe KLP, duket se Bujar Nishani është vënë në lëvizje. Kreu i shtetit nuk po e respekton ligjin “Për statusin e gjyqtarëve dhe prokurorëve”, pasi i heq kompetencat për të bërë emërime gjyqtarësh. Siç duket, pa u ngritur KLGJ, po rend për të bërë emërime, edhe pse ligji i njeh si të drejtë vetëm emërimin e gjyqtarëve të Gjykatës Kushtetuese.
Periudha tranzitore
Për ish-kreun e Komisionit Qendror të Zgjedhjeve, Kristaq Kume, ligjet e reja nuk duhet të krijojnë hapësira boshe në veprimtarinë e institucioneve. Sipas tij, ligji i ri duhet të parashikonte periudhën transitore, që organi i vjetër të veprojë derisa të krijohet organi i ri. Në këto kushte, thotë Kume, kur periudha transitore nuk është e përcaktuar në ligj, detyrat vijon t’i realizojë KLD.
“Ndryshimet në ligj asnjëherë nuk duhet të prodhojnë hapësira boshe me mosveprimin e institucionit. Nëse një institucion zëvendësohet me një institucion tjetër, përsa kohë që institucioni i ri ende nuk ka marrë detyrën, këto detyra vazhdon t’i plotësojë i mëparshmi përveçse në rastin kur në ligj shprehet “mandati i këtij institucioni përfundon në këtë kohë dhe detyrat i merr institucioni tjetër në këtë kohë. Gjithmonë ka një fazë transitore. Dhe faza transitore nëse nuk është e përcaktuar në ligj, për mendimin tim, detyrat i realizon institucioni që është”, u shpreh Kume.
