Elvana Gjata ka përjetuar një situatë të hidhur teksa punonte për hapjen e biznesit të saj të ri në Tiranë për shitjen e fustaneve të nusërisë. Më 22 qershor 2015, teksa ishte ende në fazën e punimeve, në ambientet e biznesit, asaj i kanë vjedhur dy telefona celularë, portofolin me dokumente personale dhe një shumë prej 3 mijë eurosh. Ngjarja është mbajtur e fshehtë, ndonëse këngëtarja ka bërë një kallëzim në Policinë e Tiranës. Identiteti i autorit është zbardhur shpejt nga policia, shkruan “Panorama”.
Pas arrestimit, policia ushtroi një kontroll në banesën e tij ku u gjendën disa nga sendet e vjedhura. Përveç sendeve të këngëtares në banesën e Ervin Tahirit, policia ka gjetur dhe një pistoletë imituese zhurmash, disa fishekë luftarakë dhe një vazo ku rritej një bimë kanabis sativa. Të gjitha detajet e ngjarjes zbardhen në vendimin e Gjykatës së Tiranës, që e shpalli fajtor të pandehurin Ervin Tahiri për akuzën e “vjedhjes”, “mbajtjes pa leje të municionit luftarak” dhe “kultivimit të bimëve narkotike” dhe dënimin e tij me 3 vjet e 6 muaj burg. Ai përfitoi uljen e një të tretës së dënimit për shkak të gjykimit të shkurtuar.
SI NDODHI GRABITJA E KËNGËTARES
Në kallëzimin e saj të bërë më 22 qershor 2015, Elvana Gjata ka pohuar para oficerëve të Policisë Gjyqësore se ka hapur një biznes për shitje fustanesh nusërie në rrugën “Sulejman Delvina”. Rreth orës 18:00 të kësaj dite, ajo ka qenë në këtë biznes duke u marrë me ndriçimin e katit të dytë me një grup pune. Kur ishte futur në dyqan, në katin e parë sipër tavolinës, kishte lënë dy celularët e saj të markave “Iphone 6” dhe “Samsung Edge S6” dhe çantën e dorës. Vetë ka hipur në katin e dytë. Rreth orës 18:30, ajo ka dëgjuar një zhurmë, sikur u mbyll dera në katin e parë. Menjëherë ka zbritur poshtë.
Sapo ka zbritur, ka vënë re se të dy telefonat e saj mungonin. Ka kontrolluar çantën mbi tavolinë dhe ka konstatuar se i mungonte një shumë prej 3000 eurosh. Ka njoftuar punonjësit e sigurisë së lokalit dhe policinë. Nga informacionet operative të marra, ka rezultuar se autor ishte një person me emrin Ervin Tahiri. Menjëherë nga ana e policisë është bërë kontrolli i banesës së shtetasit Ervin Tahiri, i cili jetonte me vëllanë dhe babain e tij. Gjatë kontrollit të banesës u gjetën 1220 euro dhe portofoli i Elvana Gjatës, i markës “Michael Kors”. Brenda këtij portofoli janë gjetur leja e drejtimit të mjetit në emër të kallë¬zueses Elvana Gjata dhe një kartë krediti në emër të saj.
